Hêzile Ozgur: Ma do meverdê dişmen Zap de ca bido xo

Fermandara YJA-Starî Hêzile Ozgur ard ziwan ke amadekarîyanê gerîlayan hesabê artêşa tirke pûç kerdî û vat: ''Artêşa tirke tewş bîye, nika nêzanena ke se bikera. Artêşa tirke Zap de tengayî ancena.''

Artêşa tirke ya îşxalkere 17ê nîsane de vera Zap û Avaşînî hêrişê îşxalî dabî destpêkerdene. Fermandaranê YJA-Starî ra Hêzile Ozgur  roja 26. ya hêrişan de ANFyî rê qisey kerd û xoverdayîşê gerîlayan û hêrişê îşxalî ercnayî. 

Qiseykerdişê Hêzile Ozgur ra beşêk wina yo:

''Seba ke artêşa tirke par Avaşîn de bin kewte hêrişê xo taloqê emserî kerdî. Ma zanayêne ke emser ê do hîna bi giranî hêriş bikerê. Bi serran o Zap de amadekarîya nê şerî ameyêne kerdene, tunelê şerî coka bi hawayêkê rindî ameybî viraştene. Ma her hetî ra amade bîyî. Naye ra 17ê nîsane ra nata her kes erkê xo ano ca.

Artêşa tirke plan kerdêne ke dormeyê Zapî bigêra, giranê stratejîkan bigêra, nê cayan de leşkeran bîyara war, pêro Zapî bivisna destî, gerîlayan bêtesîr bikera. Artêşa tirke vatêne qey eşkerayêne pê teyarayanê şerî, topan û teyarayanê keşfî naye bikera. La wina nêbi. A raşte artêşa tirke zanayêne ke no cade nêbeno. Coka bi teknîkî û şerê psîkolojîkî cade hêriş kerd. Artêşa tirke armanc kerdêne ke gerîlayan bitersno. 

Bêguman şer bi asanî nêno kerdene. Vera teknîkê NATOyî ma bi îradeyê xo şer kenê. Dişmenê ma namerd o, qet yew krîterî nêşinasneno. Fedakarîya ke embazê ma çeperan de mojnenê çimeyê rûmetî yo. Embazê ma girîngîya Zapî hol zanenê. Dewlete xîret kena ke pêro kurdan qir bikera. Rayberê ma seba ke  teslîmîyet red kerdo, ci rê îşkence yeno kerdene. Ma hêzê xo Rayberê xo ra gênê.

Artêşa îşxalkere tay cayan de hêzê xo ardî war. La wexto ke xo nêzdîyê tunelan kenê embazê ma danê piro. Dişmen seba ke tay cayan bivisno destî çeka kîmyewîye şuxilneno. 26 rojî yo leşkerê înan nêeşkenê gamêke aver şorê. Ma dormeyê înan girewt. Embazê ma cade danê helîkopteranê înan ro, nêverdenê leşkeran bîyarê war. Embazî danê piro, kişenê, birîndar kenê, dest nanê malzemeyanê înan ser. Artêşa tirke tewş bîya, nêzanena se bikera. Ê welatê ma de îşxalker ê. Ma soz dabi ke wayîrê mîrasê şehîdanê xo vejîyê. Pêro teknîk, hêriş, leşkerê dişmenî verê ma de qij benê. 

Gerîlayî vera îşxalkeran suîkastî ra heta sabotajî bi her hawayî çalakîyan kenê. Dişmen zî pê naye şoq bîyo. Dişmen nêzaneno ke hunerê ma senîn o, ma amadekarîya xo kerda û ma senî ca bîyê. Dişmen nêeşkeno bi asanî têbigêro, leşkeran bîyaro war. Coka dişmen nika Zap de mehsur mendo.

Gerîlayê YJA-Starî nê şerî de bi ruhê 8ê Adare, bi qerardarîyêka pîle û tecrubeyanê xo serkêşîye kenê. Tewr peyên embazanê ma Skorsky da war. No çîyêko normal nîyo. Destê ma de teknîkê NATOyî çin o. Heta nika qasê 400 leşkerî kişîyayî. Ma do meverdê dişmen Zap de ca bido xo. Çi hewce bibo ma do bikerê û Zap de artêşa tirke bin bifînê. Ma do layîqê şehîdanê xo bibê.''