Koordînasyonê PAJKî bi eşkerayîyêke Komployo Mîyanneteweyî yê vera Rayberê Şarê Kurdî Abdullah Ocalanî şermezar kerd. Eşkerayîye wina ya:

''Ma serrgêra 23. ya Komployê Mîyanneteweyî yê hêzanê mîyanneteweyîyan ê vera Rayberê ma bi hêrsê pîlî şermezar kenê. Ma pê îdîaya ke do hesabê nê komployî bipersê dekewenê serra 24. ya komployî. Ma pêro şehîdanê 'Şima nêeşkenê tîja ma tarî bikerê' bi minet û rêzdarî yad kenê. Ma şexsê Fermandar Şoreş Beytuşebabî de şehîdanê Hemleya 'Wextê Azadîye' yê Garê, Zap, Metîna û Avaşînî bi hesrete û heskerdişî yad kenê. Ma sey PAJKî do bi qerardarî xeta xoverdayîşî de têkoşînî berz bikerê û krîteranê cuya azade bihêz bikerê. Ma Rayber Apoy ke rayberîya xoverdayîşê tarîxî yê vera komplogeran kerde selam kenê.

Rayber Apoyî pê kesayetê xo yê tarîxî, pê xoverdayîş û têkoşînê xo raştîya merdimê azadî û tarîxê estbîyayîşî yê Kurdîstanî ganî kerd. Ey seba bîyayîşê hîrêyînî têkoşîn kerd. O reyna garantora raştîya cinîyan bîye. Hêzanê hegemonîkan û kapîtalîstan û dewletanê kanperestan ê herême no rayraşîyayîşê Rayberîye vera sîstemê xo sey prosesê çinbîyayîşî dî û pê nê komployê pîlî cewab da. Înan pê metod û hişmendîya serdestîya camêrdan Rayber Apo esîr kerd. Bi nê hawayî ame armanckerdene ke dewaya şarêkî û têkoşînê azadîya cinîyan bêrê çinkerdene la no armanc ser nêkewt.

Rayber Apo 23 serrî yo îşkencexaneyê Îmraliyî de maruzê îşkence û tecrîdêkê giranî beno. Binê nê şertan de o şerê tewr pîl ê nê çaxî vera komplogeran dano. Sîstemê Îmraliyî sîstemê tênakerdişî yo. Komplo û entrîkayê vera Rayber Apoyî tersê vera xoverdayîş û azadîya cinîyan o. Rayberê ma sîstemê Îmraliyî ser o nê ercnayîşî kerdbî: 'Sîstemê Îmraliyî hetê sîstem/dinyaya kapîtalîste ra vera mi ame amadekerdene. Nê sîstemî de cayê huqûq û qanûnan çin o. No sîstem seba qelskerdiş, teslîmgirewtiş û rijnayîşê îradeyî ameyo amadekerdene. Destpêkî ra nata nê prosesî de înîsîyatîf destê Amerîka de yo, Îngilîstanî û Îsraîlî zî ney de rolê pîlî kay kerdî.' Wa bizanîyo ke serê Rayberîya ma de xeylê teda esta. Na teda û no tecrîd hîna bîyê giranêr. Rayber Apoyî pê xoverdayîşî cewab da nînan. Ma sey cinîyan ganî vera tecrîdî hêrs û têkoşînê xo pîl bikerê. Famkerdişê şerê Îmraliyî yê Rayberîye şerto yewin ê cuya azade yo. Rayber Apoyî bi hawayêkê bêhempayî pê xoverdayîş û têkoşînî cewab da komplogeran, xîretê înan pûç kerd, sîstemê Îmraliyî vurna kerd bingeyê bîyayîşê hîrêyînî û sîstemê Neteweya Demokratîke ya Modernîteya Demokratîke aferna.

Komplogeran seba ke îradeyê kurdan bişiknê, ciwanan û cinîyan ê kurdan teslîm bigêrê, înan erjanê têkoşînî ra dûrî bifînê şerêko topyekûn û sîyasetêko gemarin vist dewre. No zî bi sebebê şerêkê goninî. Nê pêroyî dewamê Komployê Mîyanneteweyî yê. Vera israrê xeta têkoşîn û xoverdayîşî yê Rayber Apoyî, tewirê şarê ma, têkoşînê cinîyan serkêşîya Bahçelî û Erdoganî de, dewleta tirke ya qirkere û PDK pê stratejîyêka newîye şerêkê gemarinî kenê. Înan pê çekanê kîmyewîyan û pê paştdayîşê hêzanê mîyanneteweyîyan vera Rojawan, Vakur, Şingal, Mexmûr û Herêmanê Pawitişî yê Medya 2021 de şerêko topyekûn kerd. Rejîmo qirker ê AKP-MHPyî vera têkoşînê têgêrayîşê azadîye, xoverdayîşê şarê ma û cinîyan bin kewt û kerd ke birijîyo. Hişmendîya şerê qirkerî ya komployî pê fedakarî, bedelanê giranan, têkoşînê tarîxî û xoverdayîşî reyna ameye pûçkerdene.

2022 de sey PAJKî armanco verên ê têkoşînê ma do bibo azadîya Rayber Apoyî. Hedefê ma yê ke azadîya Rayber Apoyî reyde azadî û şorişê ciniyan do bêrê caardene, erjê na xetê do bêrê caardene û vilakerdene. Eke ma mesuldarîyanê xo bîyarê ca, felsefe û fikrê Rayberîye bîyarê ca û xeta şehîdan esas bigêrê do bieşkê biresê serkewtişî, rejîmê faşîstî birijnê, hêzanê hemkaran û xayînan mehkum bikerê.

Nê esasî ser o ganî sere de cinîyî şarê ma, xoverdayoxî û pêro dostê têgêrayîşê azadîye pê naye û azadîya Rayberîye bawer bikerê û nê esasî ser o têkoşîn bikerê. Serra 24. ya komployî vera serdestîya camêrdan û sîstemê kapîtalîstî bena serra serewedartişî ya cinî û şaran. Hemleyê 'Wextê Azadîye' û 'Vera qirkerdişê cinîyan wext wextê pawitişê cinîyan û komelê azadî yo' têkoşînî do berz bikerê û pê averberdişê xoverdayîşî bieşkê armancê xo bîyarê ca. Bi na îdîa û qerardarî plananê komployî pûç bikerê û azadîya Rayberîye bîyarê ca.''