Aktîvîsta Têgêrayîşê Cinîyan ê Azadan (TJA) Zelale Bîlgîn derheqê alozîye de ke PDKyî Başûrê Kurdîstanî de awan kerde û derheqê amadekarîya PDKyî ya seba şerî de ANFyî rê qisey kerd. 

Bîlgîne ard ziwan ke vera polîtîkayanê parçekerdişê kurdan wextêkê zêdêrî ra nata xebatê yewîya neteweyîye yenê kerdene û vat: ''Nê xebatî bi xurtî dewam kenê la heman wextî de polîtîkayê serdestan ê seba na cografya zî nêqedîyenê. Rojhelato Mîyanên newe ra yeno dîzaynkerdene. Coka xîret yeno kerdene ke mîyanê kurdan de şerêk vejîyo û kurdî bi nê hawayî bêstatu bimanê. Serebûtê Başûrê Kurdîstanî ma zaf qerqilnenê. Ma wina fikirîyenê ke ganî mabênê Tirkîya û PDKyî de hemkarîye çinbe. Dejê birakujîya 1990an hema zî teze û ganî ya. Hemkarîya PDK û Tirkîya pêro parçeyanê Kurdîstanî visnena binê tehlukeyî.''
 

Zelale da zanayene ke ê sey TJA giranîye danê yewîya neteweyîye ser û vat: ''Nê esasî ser o ma reyna venga partî, dezgeh, şexsîyetan danê ke wa xebatanê yewîya kurdan sey dermanê dejan bîyarê ca. Ma nêwazenê reyna gonîya kurdan pê destê kurdan rijîya. Şer de tewr zaf cinîyî zerar vînenê. Ganî wird perrî zî pê provakasyonan mexepîyê. Pê destê kurdan rijîyayîşê gonîya kurdan ra zêdêr çîyo zehmet û giranêr çin o. Tirkîya zere û teberê sînoranê xo de tim wazena kurdan bifetisna, kamca de destkewteyê kurdan estbê Tirkîya hêrişê uca kena. Ganî sere de Birêz Mesûd Barzanî pêro kurdî seba yewîya neteweyîye rolê xo bîyarê ca.''

Zelale Bîlgîn peynîya qiseykerdişê xo de wina vat: ''Ganî kurdî û partîyê kurdan têkoşînê xo de ameyoxê xo, cuya azad, menfaatanê hemparan û eşkerakerdişê çarenusê xo ser o vinderê. Coka ganî partîyê Başûrê Kurdîstanî nê esasan ser o têbigêrê û nê babetan de hesas bibê. Seba yewîya neteweyîye koma cinîyan zî amebî têhet. Ma do na kome reyde xebatanê hemparan xora bikerê.''