PDK bi waştişê Tirkîya bi rayîrê çend şexsîyetan herêma Behdînan û Bradost de dest bi awankerdişê sîstemêkê neweyî yê çetekarîye keno. Yeno vatene, amacê na grûbe o yo ke hemverê PKK’yî de karê ajanîye seba îşxalkarîya Tirkî ya herêma Bradostî bikero.
Partîya Demokrat a Kurdistanî (PDK) serê waştişê dewleta Tirkî ya îşxalkare, çend mesuldarê leşkerîyî seba awankerdişê bendanê kontrolî virazena û grûbêka newî ya çeteyan wezîfedar kena. Goreyê hayîdarîyanê ke ANF’yî herême ra girewtê nê mesuldarê PDK’yî Şêx Îmran Hacî, Mihemed Lolanî yo ke birayê Şêx Hisên Lolanî yo û Mamî Erşad o parlementerê PDK’yî yo.
PDK û MÎT Hemkarî Kenê
Şêx Îmran fermandaranê payeberzan ê leşkerîyan ra yew ê Barzanan o û heman wextî de endamê MÎT’ê Tirkîya yo. PDK û Tirkîya hem hetê madî û hem zî hetê teknîkîyî ra îmkanê pîlî dayê Îmranî ke seba ciwananê herêma Bradostî hemverê PKK’yî de bişuxulno.
Heman wextî de no kes wazeno ke mîyanê eşîra Bradost û Herkî de terîqeta sofî (Cîhad) gane bikero. Bi nameyê Îslamî herême de gêreno û şarî ra pereyan arê dano. Nê kesî û sofîyî ça gerîlayan yan zî wesayîtanê PKK’yî bivînê bi rayîrê Parastinî, qereqolanê Lêlikanî û Çiyadêlî yê MÎT’î Tirkîya hayîdar kenê.
Gama ke kalikê Şêx Hisênî Şêx Reşîd Lolanî ciwîyayêne hemverê PDK û dewleta Tirkî ya îşxalkare de bi. Dimayo ke o merd Şêx Hisên û Şêx Îmran bi nameyê xo, qismêkê pîlî yê eşîre û terîqeta xo teslîmê PDK û Tirkîya kerdo.
Şêx Îmran seba arêkerdişê şarê herêma Bradostî dormeyê xo de xeylî gêra. La şarê herême karê ajanîya hemverê PKK’yî red kerd û bi çetinî cewabê Şêx Îmranî da.
Wareyê Awankerdişê Grûbanê Çeteyan de PDK Mirdîya Xo Bitecrube yo
Ercêno ke merdim bîyaro vîrî Kurdistan de PDK karê awankerdişê çeteyan de wayîrê tecrubeyêkê pîlî yo. Verê nikayî binê îşxalkarîya dewleta Tirkî de çend grûbê çeteyî awan kerdî û bi rayîrê nê çeteyan çend şorişgêrê pîlî yê Başûrê Kurdistanî, sey Şehîd Mame Rîşe, Şehîd Aram û Şehîd Doktor Sîrwan şehîd kerdî.
