Hemserekê Partîya Cuya Azade ya Kurdîstanî (PJAK) Sîyamend Muînîyî ard ziwan ke Îran de PJAKî ra ber yew teref zî wayîrê projeyî nîyo. Muînî serebûtê Rojhelatê Kurdîstanî û Îranî Şarpressî rê ercna.

Qiseykerdişê ey ra beşêk wina yo:

''PJAK pêro xebat, rêxistin û amadekarîyanê xo seba ameyoxê Rojhelatê Kurdîstanî û Îranî keno. Îran de PJAKî ra ber yew teref zî wayîrê projeyî nîyo. Îqtîdarê îşxalkerî û dîktatorî do heta peynî nêmanê. Plan û projeyê ma caardişê azadîye ser ê. Ma seba ke rêxistinîya xo xurtêr bikerê û komelî zî rêxistin bikerê têkoşîn kenê. Ma çarçewa Konfederalîzmê Demokratîkî de îdareyê xoserî wazenê.

Ganî kurî seba her çî xo amade bikerê ke bieşkê rayberîya azadîya Kurdîstanî bikerê. Ma kongreya 5. de projeyê cepheyê Kurdîstanî pêşkêş kerdbi. Tay dezgehê Rojhelatî û tay hemwelatîyê Başûrî tedayanê PDKyî ra nêeşkenê yewîya xo awan bikerê. Ma zanenê ke PDK hetê dewleta tirke ya îşxalkere de yo. PDK goreyê menfaatanê Tirkîya û Îranî xebitîyeno.

Heta nika Komara Îslamî ya Îranî seba çareserkerdişê meseleyanê şaran projeyêk nêvet werte. Eqsê ci Îran wazeno pêro hêzanê Rojhelatî parçe bikero, şaran yewbînan rê dişmen bikero. Tirkîya û Îran pîya vera kurdanê azadan operasyonanê hewayî kenê. Bi taybetî pê îxaneyê Barzanîyan tay embazê ma şehîd bîyî.  Komara Îslamî têna kurdan kena hedef û seba çinkerdişê kurdan sîyasetêkê cîyayî ana ca. Armancê PJAKî azadî û xelisnayîşê şarî yo. Ma vera pêro astengîyan têkoşîn bikerê.

Ma hêzê pawitişî yê. La her ke vera ma hêriş yeno kerdene ma x pawenê. Hêzanê ma xo weş aver berdo û warê leşkerî, sîyasî, dîplomasî û çalakîyanê leşkerîyan de xo bihêz kerdo û wayîrê tecrubeyêkê pîlî yo. Ma girêdayeyê azadîye yê. Armancê ma serkewtiş o.''