Komîteya Merkezî ya PKKyî bi wesîleya Roşanê Newroze eşkerayîyêke daye.

Eşkerayîye wina ya:

''Ma sey Têgêrayîşê Azadîye yê Kurdîstanî û şarê kurdî Newrozêka newîye de yê. Newroze roşanê ma yê yewîye, xoverdayîş û azadî yo. Newroze roşananê kahanan ê azadîye yê tarîxê merdimîye ra yew o. Serkêşîya Rayberîye û PKKyî de Newroze hînî hîna manadar û rind a. Senî ke xoza wisar de zîl dana, ma zî her Newroze de xo newe kenê, benê wayîrê ruh û hişmendîya yewîye, xoverdayîş û azadîye.

Sey têgêrayîş, şar û dostanê xo, ma Newroza 2022î bi nê hîs û fikran pêşwazî kenê. Serra newîye ya Newroze nê esasî ser o pêşwazî kenê. Çar parçeyanê Kurdîstanî û çar hetanê dinya de Newroze bi coşî yena fîrazkerdene. Ça de welatperwerî estbê Newroze uca de qetî yena fîrazkerdene. Bi coş û qerardarîyêka pîle ma dest pê serra newîye ya Newroze kenê. Ma pê bawer ê ke na rewşe do pêro serre dewam bikera û her roje sey Newroze têkoşînê demokrasî û azadîye do bêro geşkerdene.

Nê esasî ser o ma verî yê Rayber apoyî Newroza pêro embazan, şarê ma yê welatperwerî û dostanê xo yê şorişgêran û demokratan fîraz kenê û înan rê serkewtiş wazenê. Ma têkoşînê azadîye selam kenê ke serkêşîya Xoverdayîşê Îmraliyî de yeno kerdene, koyan, şaristan, zîndanan de dewam keno û armancê ci azadkerdişê Rayber Apoyî yo. Şexsê şehîdanê ma yê pîlan ê Newroze Mazlûm Dogan û Zekîye Alkan de pêro şehîdanê xo bi rêzdarî yad kenê. Hewteyê Çêrî yê şarê xo fîraz kenê û şexsê çêranê ma yê pîlan Mazlûm Dogan û Mahsum Korkmazî de şehîdanê xo yê çêran reyna yad kenê. Ma venga şarê xo û dostanê xo danê ke her roja serra newîye bikerê sey Newroze!

Seke zanîyeno Newroza 2022î serra 50. ya Hemleya Rayberîye û ronayîşê bingeyê PKKyî ya. Serra newîye ya Newroze serra 50. ya Rayraşîyayîşê Rayberîye yê Apogîran û PKKyî ya.Hemleya Rayberîye ya Apogîran Newroza 1973î de ameye pê. Koma Apogîran Newroza 1973î de warê Bendawa Çubukî yê Anqara de kombîyayîşêk de awan bîye. Bi nê hawayî vera teda û tarîtîya derbeya 12ê Adara 1971î raştîya roşnîye û xoverdayîşî ya Têgêrayîşê Azadîye yê apogîran awan bîye. No rayraşîyayîşo raştikên ê Apogîran nika dest pê serra xo ya 50. keno. Eşkera yo ke raştîya Rayber Apoyî Rayberîyêka Newroze ya. PKK zî sey partîyêka Newroze ronî û aver şi. Şarê kurdî rayberîya Rayber Apoyî û PKKyî de, têkoşînê azadîye reyde vurîya şarê Newroze. Tarîxê Kurdîstanî de reya verêne Rayberîya Azadîye û têgêrayîşê partîye bêmabên 50 serrê xo temam kerdî û averşîyayîşê tarîxî afernayî.

Nê esasî ser o ma kewtê serra 50. ya Hemleya Rayberîye ya Apogîran û Têgêrayîşê Azadîye. Ma cinîyan, şarê kurdî û ciwanan fîraz kenê ke mîyanê pêro şert û mercan de bêmabê 50 serran têkoşîn kerd û Rayberîyêka winasêne ya partîye afernaye. Ma şehîdanê nê rayraşîyayîşî şexsê embazan Hakî Karer, Mazlûm Dogan, Hayrî Dûrmûş, Kemal Pîr, Sakîne Cansiz, Mehmet Karasûngûr, Agît, Bêrîtane û Zîlane bi hezkerdiş, hûrmet û minetî yad kenê. Ma sozê xo dibare kenê ke armancanê înan bîyarê ca û wayîrê vîrameyîşê înan vejîyê.

Bêguman nê rayraşîyayîşê azadîye yê fîrazî de keda tewr pîle aîdê Rayber Apoyî ya. Rayber Apoyî hem no têkoşîno pîl da destpêkerdene hem zî hertim bara tewr pîle girewte xo mil û wezîfeyê xo ardî ca. Sey milîtan, partî û şarî ma mîyanê sîstemê qirkerî ra xelisnayî û xeta cuya azade de newe ra afernayî. Ey no rayîrê azadîye hem xurt kerd hem roşnî kerd û verê serkewtişan akerd. Coka ma çend hûrmetê ci bikero zî kêm o. A raşte eke ma raştîya Rayberîye fam bikerê û bîyarê ca o çax ma eşkenê hûrmetê ci bikerê. Ma bi nê famî vanê ke her hela serra 50. ya têkoşînî de ma do goreyê ney têbigêrê.

Nê rayraşîyayîşê azadîye yê fîrazî de şehîdanê ma yê çêran paştdayîşo tewr pîl da raştîya Rayberîye. Raştîya şehîdan kerd ke agêrayîş têkoşîn bêmabên o. Êyê ke Rayberîye reyde ma perwerde kerdî, aver berdî şehîdê ma yê çêr ê. Raştîya şehîdan hêzê ma yê xoverdayîşî û waştişê ma yê serkewtişî aferna. Sey şar û têgêrayîşî ma bi na raştîya şehîdan resayî heta nê çaxî. Coka ma rê esas o ke Rayberîye reyde raştîya şehîdan hol fam bikerê û bi serkewtişî bîyarê ca. Ma tim şehîdanê xo yê çêran bi rêzdarî û minetî yad kenê û ma do tim înan reyde bibê. Rayraşîyayîşê ma yo qerardar û serkewte serra 50. de do nê esasî ser o bibo.

Bêguman hêzê gerîlayanê çêran bîyî hêzo ma yo rayber ke xeta fedayîtî de şer kenê. Nê esasê afernayîşê fedakarî û çêrîya gerîlayan de cinîyan û ciwanan, şarê kurdî no rayraşîyayîşê çêrîye yo 50 srre aferna. Sere de şarê tirkî şarê filîstîn, ereb, armenî, asûrî-sûryanî û pêro şarê bindestî nê rayraşîyayîşî rê hetkarî û destekêko pîl da. Bi na wesîle ma nê her kesî bi rêzdarî û hûrmetî selam kenê.''