Komîteya Tekîlîyanê Teberî ya PKKyî derheqê ercnayîşanê peyênan ê Mesrûr Barzanî yê PDKyijî de eşkerayîya nuştekîye daye û nê pare kerdî:

''Şarê kurdî prosesêkê tarîxî yê zaf muhîmî ra ravêreno. Têkoşînê azadîye bi xurtbîyayîşî dewam keno. Hetê bînî ra dewleta tirke, hêzê dişmenê kurdan û hemkarê înan veng nêvendenê. Vera hêrişanê îşxalî gerîlayê azadîye yê Kurdîstanî Avaşîn, Zap  û heme Kurdîstan de derbeyê pîlî dayê dişmenî ro. No zî zaf zor danê dewleta tirke û hemkaranê ci. Dewleta tirke û hemkarê ci seba ke têkoşînê qezenckerdişê azadîye û statu yê kurdan pûç bikerê, çîyo ke destê înan ra yeno kenê. Prosesê wina hasas û tarîxî de ganî her kes bi welapterwerîya berpirsîyarîye têbigêro. Mesrûr Barzanî yo PDKyij herinda berpirsîyarîya xo caardişî de pê eşkerayîyanê têdima kerdî ramojneno ke qey heta ewro meseleya kurdî nêameya çareserkerdene.

 Şarê kurdî eşkerayîyanê Mesrûr Barzanî yo PDKyijî biîbretî teqîp keno ke û wîna ameye dewam kerde. ''Nê eşkerayîyî eke bê name û îmzayê ey biameyêne vilakerdene qetî sey eşkerayîyanê dewleta tirke ameyêne famkerdene. Senî yew eleqeya nê eşkerayîyan û welatperwerîye esta, ma nayî teqdîrê şarê xo rê verdenê. Vano 'problemê Tirkîya bi kurdan çîn o, problemê ci bi PKKyî esto. Rojawan ganî tekîlîya xo ya bi PKKyî bibirno, eke wina mekero beno ke Tirkîya hêrişê ci bikero'  No vatiş  hemkarîye, teslîmîyet û eynî wextî de qiseykerdişê bi fekê dewleta tirke yo.

Dewleta tirke 40 serrî yo nê vacvacokî her ca de her tim vana. Mesrûr Barzanî yo PDKyij zanayîşê tarîxî û merheleya ayebîyayîşî ya neteweyîye yê şarê kurdî zaf şenik vîneno. Şarê kurdî hinî dost, dişmen , welatperwer û hemkaran rind sarisneno. Heme dinya hêrişê îşxalî yê dewleta tirke sey tehlukeyî vînena la Mesrûr Barzanî yo PDKyij  vera naye nêvejîyeno. Gama ke selehîyatdarê Tirkîya ke tede pêvînayîş keno, vanê cayo sey Kurdîstanî çîn o zî o bêrehet nêebeno. Mesrûr Barzanî herinda meşrukerdişê hêrişê îşxalî yê dewleta tirke de wa xizmetê şarê Başûrê Kurdîstanî bikero. Ganî hinî têna mevajo îqtîdar û keye semedê şarî zî çîyêk bikero. Ciwanê kurdan sey macîran rayîran de dinyaya xo bedilnenê. Wa biney wîjdanê ci bidejo ke tewirêko ehleqî-polîtîkî ramojno.

PDK û Mesrûr Barzanî bi dişmenîya PKKyî têna dişmenanê kurdan şay nêkenê, eynî wextî de xo rê bi xo xirabîye kenê. PKKyî têkoşînê xo yê nêm seserre de  bê waştişê azadîyê şarê kurdî çîyêko bîn nêwaşt û nêkerd. Her mewzî û îmkano ke semedê Kurdîstanî fînayo dest, semedê înan bedelê pîlî dayî. Qedînayîşo îdeolojîk û tesfîykerdişê DAÎŞî de rolê PKKyî pîl o. Gerîlayanê azadîye yê Kurdîstanî Mexmûrî ra heta verê Hewlêrî bi hewayêkê fedayîkî şer kerd û destûr nêda DAÎŞ Başûrê Kurdîstanî îşkal bikero. Şarê ma yê Başûrî nînan zaf hole zano.

Rojawan de xeyrê bi hezaran gerîlayan ê ke şehîd bîyî, DAÎŞ bin kewt. Şaranê sey kurd, ereb, xirîstîyan, tirkmen, çeçenan têkoşînê vera DAÎŞî de des hezaran ra zafêr şehîdî dayî. Îdareyê Vakur û Rojhilatê Sûrîye yo ke serê nê ercan û bedelan de ame ronayene kamî/e de senî pêvînayîş keno zaf hole zano. Mesrûr Barzanî û paştgêrê ci yê ke vera DAÎŞî têkoşîn nêkerd semedê Şorişê Rojawanî qet bedelêk nêdayo wazenê kamî/e de bazarîya çîyê bikerê? Şarê Rojawanî do vera nê tehdîtanê Masrûr Barzanîye cewabo tewr rindî bido. Têkoşînê azadîye yê kurdan yew nuqta de yo ke dengeyanê herême bewlî keno. Wexto winayên de ganî şarê ma vera kayanê leyminan ê dişmenî û hemkaranê ci aye bo û tewirê xo ramojno. Na çarçewa de ma sey PKKyî têkoşînê azadkerdişê Kurdîstanî do xurtêr bikerê.''