Komîteya Rayberdişî ya PKK’yî derheqê serrgêra 37’ine de xoverdayîşê Temmuze eşkerayîyêka nûştekîye weşanaye.

 Eşkerayîye de nê ameyî vatene:

„Hemverê derbeya faşîste û leşkerî ya 12’ê Êlule de 14’ê Temmuz a 1982’yî de Xoverdayîşê Rojeyê Mergî amebi destpêkerdene. Serrgêra 37’ine de ma Ruhê Xoverdayîşê Serfirazîye ya 14’ê Temmuze silam kenê. Şexsê afernayoxanê nê ruhî de ma şexsê xoverdayox Mehmet Hayrî Dûrmûş, Kemal Pîr, Akîf Yilmaz û Alî Çîçekî de heme şehîdanê mucadeleyê azadîye bi hurmet bi vîr anê. Ma reyna sozê xo tekrar kenê ke ma do amacê înan bi ser bifînê. Ma ‚Roja Anorî yê Neteweyîyî‘ yê şarê Kurdî û dostanê înan pîroz kenê. Ma vanê ke serra 38’ine yê xoverdayîşî de, do şar û têgêrayîşê ma hîna xurt şer bikero.

 Xoverdayîşo pîl ê zîndanan o ke bi Xoverdayîşê Rojeyê Mergî yê 14’ê Temmuze ame destpêkerdene, tarîtîya 12’ê Êlule roşin kerdo û ramoto ke Mucadeleyê Azadîye yê Kurdistanî do bin nêkewo. Xoverdayîşê Zîndanan o Pîl xeta azadîye ya Rayber Apoyî xo rê esas girewta û koletî û teslîmîyet red kerdê. Şaro Kurd qerarê estbîyayîş û cuya azade dayo û îrade, terz, cesaret û fedakarîya nê çîyî vetê werte. Bi vatişê Rayber Abdullah Ocalanî „Hetê temsîlkerdişê xeta partîye û afernayîşê serfirazîye de çalakîyêka xurt a.“

 Ewro gama ke ma serrgêra 37’ine ya Xoverdayîşê 14’ê Temmuze ciwîyenê, ruhê xoverdayîşî û serfirazîye her wextî ra zêdeyêr o. Serê nê ruh, qerardarî û xete de çar perçeyanê Kurdistanî de û teberê welatî de mucadeleyê ma dewam keno. Gama ke dîktatorîya Erdoganî û Bahçelîyî bi qirkerdişan wazena serê payan de bimano, têgêrayîşê ma yê azadîye pîya bi şaranê Tirkîya û Rojakewtena mîyanêne, merdimîya demokratîke dir tîfaq virazeno û hemverê tecrîdî û faşîzmî mucadeleyê Kurdistanê  Azadî û Rojakewtena Mîyanêne ya Demokratîke bi qerardarîyêka pîle domneno. Bi serkêşîya fermandaran Helmet û Dogan Serhatî Qendîl ra heta Dêrsim û Xakurkê ra heta Serhedî derbeyê giranî dîyenê artêşe îşxalkare û ajanan ro. Ciwan û cinîyê Kurdî bi mucadeleyê cuya azade heme kesan rê benê nimûne û umîd.

 Serê nê bingeyî de ma reyna „Roja Anorî yê Neteweyîyî“ şarê xo rê pîroz kenê, ma şehîdanê ma yê Xoverdayîşê 14’ê Temmuze û şehîdanê pîlan ê serrgêra 37’ine ya nê xoverdayîşî Hemra Helmetî reyna bi hurmet û minet bi vîr anê. Sere de ciwan û cinîyî, ma veng danê hemeyê şarê xo û hêzanê demokratîkan ke hemverê hişmendî û sîyasetê faşîstî, kolonyalîstî û qirkerdoxî de mucadeleyê azadîye û demokrasîyî her wareyî de bi metodanê afernayoxan hîna zêde hîra bikerê û ma veng danê ke serrgêra 38’ine ya xoverdayîşî de qetîyen serkewtiş bêro destfînayene.“