Komîteya Rayberdişî ya PKKyî serrgêra 22. ya Komployê Mîyanneteweyî de eşkerayîyêka nuştekîye daye.

Eşkerayîya PKKyî wina ya:

''Komployo Mîyanneteweyî yo ke nameyê sîstemê modernîteya kapîtalîste ser o hetê DYA ra 9ê Teşrîna Verêne ya 1998î de dîya destpêkerdene, waştêne Rayber Abdullah Ocalan îmha bikero û qirkerdişê kurdan temam bikero. Nê hêrişê komployê tarîxî û xoverdayîşê estbîyayîşî û azadîya kurdan serî ra 22 serrî derbaz bîyî. Bi na wesîle ma reyna nê hêrişê murtecî û barbarî, Komployê 9ê Teşrîna Verêneû pêro hêzanê komplogeran rê lanet kenê. Ma selam kenê Rayber Apoyo ke 22 serran ra nata vera komployî seba azadî û demokrasî xoverdayîşêkê destanwarî keno. Ma şexsê M. Halît Oral û Aynure Artan de ke şehîdê yewînî yê xoverdayîşê vera Komployî yê, pêro şehîdanê ke bi şîarê 'Şima nêeşkenê roja ma tarî bikerê' xo ver da û şehîd bîyî bi rêzdarî û minetî selam kenê. Ma serra 23. de ê pêro kesan serkewtiş wazenê ke bi armancê rijnayîşê sîstemê îşkence û tecrîdî yê Îmraliyî û caardişê azadîya Rayber Apoyî têkoşîn kenê.

Seke zanîyeno Komplo hetê DYA ra 9ê teşrîna verêne ya 1998î de dîya destpêkerene û DYA rojanê nikayênan de zî derheqê 3 îdarekaranê PKKyî de bira tepiştişî ya bi xelate daye. Reyna par serrgêra komployî de dewleta TCyî Serêkanîyê û Girê Sipî îşxal kerdî û bi nê hawayî waşt ke komplo bida dewamkerdene. Netîce de tay şaristanê girîngî yê Rojawanê Kurdîstanî ameyî îşxalkerdene, bi se hezaran kurdî ameyî koçkerdene, bi seyan kurdî ameyî qetilkerdene û bi hezaran kurdî zî ameyî birîndarkerdene. Peyê nê pêro kerdişanê faşîst û qirkeran ê dewleta TCyî de DYA esta. Ma bi na wesîle îşxalkeranê Rojawanî lanet kenê, şehîdanê xoverdayîşî bi minet û hûrmetî yad kenê. Ma pê bawer ê ke serrgêra 2. ya îşxalî de şarê Rojawanî bi hawayêkê bihêzî vera îşxalî xo ver bido. Ma înan rê serkewtiş wazenê.

Qirkerdişê kurdan dewamê komployî yo

Ma hol zanenê ke Komployê 9ê Teşrîna Verêne hedef kerd ke Rayberê Şarê Kurdî îmha bikero, PKK tasfîye bikero û bi nê hawayî kurdan bi temamî qir bikero. Yanî Komplo verê çareserîya demokratîke ya meseleya kurdan gêno, demokratîkbîyayîşê Tirkîya û Rojhelatê Mîyanênî asteng keno. Coka Komplo parçe keno, dano têvera û hîşmendîya kolonyalîste û faşîste temsîl keno. Komplo keno ke qirkerdişê kurdan dewam bikero. Şerê Dinya yo 3. 30 serran ra nata çimeyê xo nê komployî ra gêno. Coka ganî ma destûr nêdê ke Komplo û meseleya kurdan dewam bikerê.

Peyê sîstemê îşkence û tecrîdî yê Îmrliyî de DYA û Konseya Ewropa estê. Nê hezî qirkerdişê kurdan anê ca û vera azadîya kurdan vindenê. Nê hêzî hemkarê pêro sûcanê dewleta TCyî yê û zeraranê pîlan danê kurdan û têkoşînê azadîye. Nê hêzî hem sîstemê Îmraliyî weye kenê hem zî vera îdareyê partîya ma hêrişê bi xelata 12 mîlyon dolarî danê dewamkerdene. Ma venga nê hêzan danê ke wa hîşmendîya qirkerdişê kurdan, komplo û dişmenîya vera PKK û Rayber Apoyî ra fek vera bidê.

Gardîyanê Komployî dewleta TCyî ewro bîya sekbanê sîstemê tecrîd û îşkenceyî yê Îmraliyî. TC hetê komplogeran ra ame wezîfedarkerdene ke Komplo ser bikera. Raştîya AKP û Erdoganî zî na ya. Coka wexto ke AKP nêeşka Komplo îdare bikero MHP erşawîya hetkarîya ci. Dîktatorîya faşîste ya AKP-MHPyî ya ke dewamê Cuntaya 12ê Êlule ya, seba menfaatanê keye û îqtîdarê xo pêro Tirkîya berde verê felaketan. Sere de seba cinî û kurdan rijnayîşê AKP-MHPyî seba silametîya pêro merdimîye û şaranê Tirkîya mecbûrî yo.

Bêguman têkoşînê 22 serran ê vera Komployî beşêko girîng û zehmetin ê tarîxê ma bi. Rayberîya Serek Apoyî û PKKyî de ma vîst hezarî ra zêdêr şehîdî dayî û destkewteyê pîlî vistî xo destî. Netîceya têkoşînê 22 serran de derbê giranî dîyayî komplogeran ro û komplo bin kewt. Xora rayberîya nê prosesî hetê Serek Apoyî ra ameye kerdene. Serek Apoyî hem rayberîya xoverdayîşê vera sîstemê Îmraliyî kerde hem zî bi pawitişanê xo Têgêrayîşê Azadîye kerd newe û kurdan û bindestan rê rayîrê xelisîyayîşî mojna. Rayber Apoyî bi paradîgmaya xo ya newîye PKK kerd partîya ekolojîk, azadîwaştoxa cinîyan û demokratîke. Rayber Apoyî bi projeyê 'Konfederalîmzê Demokratîkî û Xoserîya Demokratîke' bingeyê kesayetê azadî û komunê demokratîkî ser o çareserîya pêro meseleyan eşkera kerde û bi nê hawayî bi rayberê pêro bindestan. Nê 22 serran de şorişê azadîya cinîyan ame caardene, vera DAÎŞî bi tesîrê Şorişê Rojawanî Têgêrayîşê Azadîye yê Kurdîstanî pêro dinya ra vila bi û têgêrayîşê ma bi têgêrayîşê pêro cinî, ciwan û kedkaranê dinya.

Serrgêra 23. de hedefê ma azadîya fîzîkî ya Rayber Apoyî ya

Nika ma sey kurdan û Têgêrayîşê Azadîye yê Kurdîstanî bi Hemleya 'Tecrîd, Faşîzm, Îşxalî rê Bes o, Wext Wextê Azadîye yo!' dekewenê serra 23. ya têkoşînê vera Komployî. Kerdişê ma yê 22 serran ê vera Komployî eşkera kenê ke ma do serra 23. ya Komployê Mîyanneteweyî de do se bikerê. Wina aseno ke pêro cinî, ciwan, kurd, merdimîye û hêzê demokratîkî wayîrê Hemleya ma vejîyayî. Gerîlayaê ma yê çêrî derbanê giranan danê dişmenê faşîst û kolonyalîstî ro û bi nê hawayî rayberîya hemle kenê. Her ca de çalakîyê demokratîkî yenê kerdene û nê çalakîyan de yeno waştene ke sîstemê tecrîd û îşkenceyî yê Îmraliyî û faşîzmê AKP-MHPyî bêrê rijnayene û Rayber Apo bêro azadkerdene. Eşkera yo ke Hemleya Têgêrayîşê ma her çî ra zêdêr hêverî rijnayîşê sîstemê Îmraliyî û azadîya Rayber Apoyî hedef kena. Nê esasî ser o 10ê Teşrîna Verêne asta globale de sey 'Roja Azadîya Seba Ocalanî' ame îlankerdene.

Ma bi hedefê binkerdişê Komployî û caardişê azadîya Rayber Apoyî dekewenê serra 23. ya têkoşînê vera Komployî. Ma pê bawer ê ke ma do çar parçeyanê Kurdîstanî de û her cayê dinya de bi çalakîyanê xo nê hedefî bîyarê ca. Nê esasî ser o ma reyna sere de cinî û ciwanan venga pêro kurdan û dostanê xo danê ke bi zixmî tewrê Hemleya 'Wext Wextê Azadîye' bibê, Komployê 9ê Teşrîna Verêne bi hêzêr protesto bikerê, 10ê Teşrîna Verêne de tewrê çalakîyanê 'Roja Azadîya Rayber Apoyî' bibê û bi qetî azadîye bivisnê xo destî!''