Komîteya Paştdayîşê Keyeyanê Şehîdan a PKK’yî pêhesna ke Sînanê Sor (Alî Aktaş), Serhat Amanos (Emrûllah Dûrsûn), Navdar Sinegir (Mîkaîl Ozdemîr), Serhat Şafak (Vehîp Tekîn) û Şiyar Faraşîn (Celal Ozturk) 21'ê Adare de rîyê hêrişê hewayî yê artêşa Tirkî yê serê Wareyê Pawitişî yê Medya şehîd bîyê.

Komîteya 14’ê Temmuze bi sernameyê “Keyeyanê ercayeyî yê Aktaş, Ozturk, Dûrsûn, Ozdemîr û Tekînî rê” peyamêk şirawit. Peyam wina yo:

“Her merheleya mucadeleyî seba azadîye dest pêkerde, bi bedelanê pîlan bica amî. Seba pawitişê ercanê şarê Kurdî û heme şaran, seba cuyêka azade, mîlîtanê nê têgêrayîşî bê dibendî canê xo seba serkewtişê nê amacê pîlî feda kerdî. Hewna zî bi ruhê fedayî yê pîlî hemverê hêrişanê peydeperweran û kolonyalîstan de xover danê, gama ke lazim beno canê xo seba serkewtişê şarê ma feda kenê, mucadele kenê û şehîd benê.

Tewr peynî 21’ê Adare 2019 de rîyê hêrişê hewayî yê dewleta Tirkî ya îşxalkare û kolonyalîste ra, hemrayê ma Alî Aktaş ê bi qodê Sînanê Sor, Emrûllah Dûrsûn ê bi qodê Serhat Amanos, Mîkaîl Ozdemîr ê bi qodê Navdar Sînegir, Vehîp Tekîn ê bi qodê Serhat Şafak û Celal ozturk ê bi qodê Şîyar Faraşîn Wareyê Pawitişî yê Medya de şehîd bîyî.

Mucadeleyo Bêmabên ê 41 Serrî

Sînanê Sor ke serra 1978 de PKK nas kerd û emrê ciwanî de tewrê mîyanê Mucadeleyê Azadîye bi, serra 1959 de qezaya Qoserî ya Mêrdînî de ame dinya. Dimayo ke lîse qedîna da peyê şopa Rayber Apoyî û heta vîsta peyêne ya şehadetî 41 serrî bi waştişê pîlî yê mucadeleyî Beka ra heta Botan û ûca ra zî heta hemeyê koyanê Kurdistanî bêmabên mucadele kerd.

Cuya Ê Xulasaya Xeta PKK’yî yo

Sînanê Sor şopdar û mîlîtanêko weçînite yê Rayber Apoyî bi, ke her wareyê mucadeleyî û sazîyê ke xebetîyayî de bi performans û hêzêko xurt ê moralî problem çareser kerdêne, temsîlê weyîkerdeyî yê mîlîtanîya PKK’yî her derece de bica ardêne. Şar û hermayanê xo rê bîyêne moral, bi tecrube û xorîbîyayîşî heta peynî tewrê mucadeleyê partî bi, xo mesuldarîyanê tewr giranan ra zî dûrî nêgirewt. Naye ra eke yeno waştene ruh, xoverdayîş, eşqê mucadeleyî û hêrsê PKK’yî yê hemverê kolonyalîzmî, hemkarî û xîyanetî bêro famkerdene, ganî Sînanê Sor bêro temaşekerdene. Çunke cuya Sînanê Sorî xulsaya PKK’yî ya.

Temsîlo Weyîkerde yê Mîlîtanbîyayîşî

Embazanê ma ra yewo ke rîyê hêrişê hewayîyî yê TC’yê kolonyalîstî ra şehîd bi Emrûllah Dûrsûn ê bi nameyê qodî Serhat Amanoso ke serra 1991 de Cûdî de tewrê refanê gerîlayan bi. Qezaya Gimgimî ya Mûşî de serra 1970 de ame dinya, gama ke şi unîversîte Mucadeleyê  Azadîye ya Kurdistanî nas kerd. Dejê şarê ma nizd ra dîyî û seba peynîya nê bîyaro tewrê refanê gerîlayan bi. Mîyanê 28 serran de bi fedakarîyêka pîle mucadele kerd û bi samîmîyetê xo yê Apoyîyî heme problemî çareser kerdî, bi temsîlo tewr weyîkerde yê fermandarî û mîlîtanîye yê Rayber Apoyî.

Bi Qerar û Netîcegirewtox Bi

Serra 1999 de wexto ke Fermandarê Eyaletê Amanosî bi gama ke grûbêkê hemrayanê xo dir xo ant Wareyê Pawitişî yê Medya esîr kewt destê rejîmê Baasî yê Sûrîye. Dimayo ke di serran ra zêde esîr mend reyna xo resna erdê welatê xo û sere de tewrê xebatanê leşkerîyan bi, dima ra zî bi tecrubeyê xo yê pîlî dest bi xebatanê sîyasî, bawerî û dîplomatîkan kerd. Xeylî xebatan de bi mîlîtanêkê PKK’yî yo aktîf. Bi hemeyê enerjîya xo tewrê karanê yewîya neteweyîye ya şarê ma bi. Bi weyîkerdeyîya xo ya îdeolojîk-polîtîke bi heskerdiş, girêdayîş û fedakarîya seba şarê xo, welat û Rayber Apoyî xebetîya, bi netîcegirewtişî xebate kerde û her wareyo ke tede bi kerd xurt. Bi keda pîle mîyanê mucadeleyê azadîye de bi qerardarîya xo ya tewirê Apoyîyî û şexsîyetê xo yê nimûneyî do mîyanê mucadeleyê ma de tim bêro vîrardene.

Şer ra Heta Dîplomasî

Mîkaîl Ozdemîr bi nameyê qodî Navdar Sînegir ke rîyê hêrişê dewleta TC’yî yê faşîstî ra şehîd bi serra 1993 de tewrê refanê mucadeleyê azadî ya Kurdistanî bi. Navdar Sînegir serra 1974 de qezaya Xîzanî ya Bedlîsî de ame dinya, dimayo ke lîse qedîna SStenbol de tewrê mucadeleyî bi. Mîyanê 26 serran ê mucadeleyî de sere de Eyaletê Amedî Başûrê Kurdistanî, Sûrîye, Iraq û Tirkîya de xebate kerde, heman wextî de bi hawayêkê aktîfî tewrê xebatanê dîplomasî bi. Navdar Sînegir ke dereceyêka berze de bi fedakarîye û waştişêkê pîlî xebate kerde, bi şexsîyetê xo yê mutewazî û hêzê xo yê pratîkî yê çareserîye bi mîlîtanêkê PKK’yî ke her tim hemrayê ê ro ci gêrayêne û persayêne. Tena mîyanê gerîlayan de nê heman wextî de mîyanê şarî de zî hişmendîya welatperwerîye kerde xurt. Bi hêzê xo yê fikrî, bi afernayoxîye û westatîya xo ya têkilîyanê merdiman de, hetêna ra bi dîsîplînê xo yê xebate de bi mîlîtanêko Apoyî ke şar ci ra bawer bi û ci ra hes kerdêne.

Dêrsim ra Heta Soran

Vehîp Tekîn bi nameyê qodî Serhat Şafako ke tewrê karwanê şehîdan bi serra 1974 de Agirî de ame dinya. Serra 1988 de emrê ciwanî de tewrê refanê gerîlayan bi. Serra 1990 de verê xo da Beka. Wareyê Rayber Apoyî de pîya bi averberdişê xo yê hetê îdeolojîk-polîtîkî ra şexsîyetê xo yê fermandarîya leşkerîye zî xurt kerd û verê xo da welat. Dêrsim, Zagros, Xakurkê û Soran de bi gerîlayêko aktîf. Nê heme wareyan de hemverê kolonyalîzmê îşxalkarî de mucadeleyêko bêeman rayra berd.

Rixmo ke Linga Ci Tera Bîye Nêvindert

Seba ke paya xo dabî serê mayîna hêzanê kolonyalîstan ê îşxalkaran linga ci tera bîbî, la rixmê naye de zî rojêk nêvindert. Rojakewtene, Rûsya, Kazakistan, Ozbekistan û Ûkrayna de tewrê xebata şarî bi. Heman wextî de tewrê xebata Akademîya Zanistê Cimatkî û Edebîyatî bi. Hetê fîzîkkîyî ra zehmetîyan bianco zî o gazîyêkê mucadeleyê azadîye bi û mîyanê şertanê tewr giranan de verê xo da koyanê azadîye. Seba nê nizdbîyayîşê xo mîyanê embazanê xo de sey ‚aşiqê koyî‘ ameyêne naskerdene. Bi şexsîyetê xo yê mutewazîyî xebate de bi moral û bi kedkarîya xo bi şexsîyetêko nimûne. Bi mucadeleyê xo yê zêdeyê 30 serrî mîlîtanîya Apoyîye şexsê xo de ramote.

18 Serrîya Xo de Tewrê Refanê Gerîlayan Bi

Celal Ozturk bi nameyê qodî Şîyar Faraşîn qezaya Elbakî ya Wanî de ame dinya û domanîya xo de gerîla nas kerd. 18 serrîya xo de verê xo da wareyanê gerîlayan û serra 2014 de tewrê gerîlayan bi. Bi xusûsîyetê xo yê kedkarî û fedakarî tim vernî de bi û resa dereceya mîlîtanîya Apoyîye.

Vîrameyîşê Înan Ma rê Rayîr Ramot

Hemverê sîstemê qirkerdoxî yo ke serê şarê ma û şaran de yeno ferzkerdene, bi hêzê ke ma şehîdanê xo ra gênê ma mucadeleyê xo bi heman hêzî domnenê. Vîrameyîşê panc hemrayanê ma yê ke tewrê artêşa şehîdan bîyî sey vizêr ewro zî do rayîr ramojnê ma. No yew bingeyê dîyalektîkê PKK’yî yo. Hemrayê ma yê bianorî û qehremanî yê dewaya azadîye ya şarê Kurdî sey manaya tekane ya cuya xo dîye, loma ma do înan çi rey vîr ra nêkerê û heta peynî hewn û xeyalê înan dir bê. 

Ma heme şarê Kurdistanî rê û keyeyanê hemrayan ê ma yê şehîdan rê serweşîye wazenê. Ma dejê şarê xo û keyeyanê xo pare kenê û sey hemrayê înan vane ke tewr tay ma qasê keyeyanê xo bi şehadetê înan dejayê. Ma kenê ke bi wedartişê çek û beyraqa înan, bi xurtkerdişê mucadeleyî yê serê xeta şehîdan nê dejê xo kemî bikerê. Ma şima ferdanê keyeyan ra zî umîd kenê ke bi heman sebir û metanetî nê şehadetî pêşwazî bikerê.

Na çarçewaye de ma soz danê ke seba awankerdişê Rojakewtena Mîyanêne ya demokratîke û Kurdistanêkê azadî ma do heme hucreyanê xo seferber bikerê û layîqê şehîdanê xo bê. Ma şarê xo rê û keyeyanê hemrayan ê xo yê şehîdan rê serweşîye wazenê. Ma reyna şehîdanê xo bi hurmet bi vîr anê ke ê afernayoxê azadîye yê.”