Komîteya Merkezî ya PKK’yî eşkerayîyêka nuştekîye weşanaye û hemverê hêrişê serê kadroyanê serkêşan Dûran Kalkan û Besê Hozate, ke hetê kanalê televîzyonî yê K24’î ra yeno kerdene, razînêbîyayîşê xo ard ziwan.

 Eşkerayîya PKK’yî de nê çîyî ameyî vatene:

“Dewleta Tirkî hêrişanê xo yê qirkerdişî yê serê Vakur, Başûr û Rojawanî zêde kerdê. Nê rojanê peyênan de kesanê xayîn û îxanetkaran şuxulnenê û şerê psîkolojîkî kenê. Xeylî eşkera yo ke dewleta Tirkî wazena bi nê metodî şerê leyminî bikero. Wazena ramojno ke mabênê Kurdan de şerêko pîl esto. La rasta ci bi rayîrê şerê psîkolojîkî wazena îşxalkarîya Başûrê Kurdistanî meşrû bikero. Dimayê referandûmê 25’ê Êlul a 2017’î dewleta Tirkî ya îşxalkare şerê xo yê psîkolojîkî hîna kerd zêde. Nê rojanê peyênan de zî kanalê bi nameyê K24’î serê xeta dewlete de hemverê PKK’yî de propaganda keno.

 Dewleta Tirkî dimayê 23’ê Hezîrane hêrişê xo yê serê Başûrê Kurdistanî hîna kerdê zêde û nê hêrişan de şaro sivîl yeno qetilkerdene. Hemverê nê îşxalî de gerîlayê azadîya Kurdistanî xover danê. Na rastî hetê heme şarê Kurdistanî û rayapêroyîye ya demokratîke ra yena dîyene û no vengdayîşê xoverdayîşî yo. Rixmo ke raste de rastîyêka winayêne esta, televîzyonê sey K24’î û êyê ke xeta ê ser o weşan kenê hemverê kadroyanê serkêşan ê PKK’yî Dûran Kalkan û Besê Hozate de antî-propagandayan kenê. No zî kar resneno dewleta Tirkî. Sere de kesê ke Başûrê Kurdistanî de ciwîyenê, heme şarê Kurdistanî na rastî vîneno. Kes û dormeyanê PDK û YNK’yî zî hemverê nê şerê psîkolojîkî de reaksîyon da. Ê anê ziwan ke ê do nêverdê mabênê hêzanê Kurdistanîyan de şer virazîyo. Şeranê serranê verênan de zirar tewr zaf gina Kurdan ro. No şer hetê Kurdan ra nê la hetê kolonyalîstan ra ameyo destpêkerdene. Na yewe ra zî tewr zaf no şer fayde resneno înan. Na yewe ra zî ganî kongreya neteweyî mabênê Kurdan de bêro viraştene.

 Eke na kongre nêcemêyo do trajedîyê sey serranê verênan virazîyê. K24 û kanalê sey ê, ê do xizmetê şerêkê winayênî bikerê. No hêrişo ke serê hemsereka Konseya Rayberdişî ya KCK’yî Besê Hozate de ameyo kerdene hêrişêko hemverê xeta azadîya cinî yo ke Rayber Apoyî awan kerda. Bi hêrişê serê endamê Konseya Rayberdişî ya PKK’yî Dûran Kalkanî zî wazenê hêrişê xeta neteweya demokratîke bikerê. Kesanê veradayeyan vejenê programan û înan şuxulnenê. Nê kesî do çi rey nêeşkê cayo bianor ê Besê Hozate û Dûran Kalkanî yê mîyanê mucadeleyê demokrasî û azadîye yê Kurdistanî rê zirar bidê. Ma zanê ke amacê nê hêrişan çi yo û do nê hêrişî çi rey nêresê amacê xo.”