Hemserekê HDPyî yê Mêrdînî Salîh Kudayî derheqê qeyûmanê ke şaredarîyanê kurdan de ameyî cakerdene de ANFyî rê qisey kerd.

Kudayî vat: ''Qeyûmî semedê asîmîlasyonê kulturkî û rantî ameyî cakerdene. Qeyûmo ke tîya 2016 de ame cakerdene bi qefilnayîşê dezgehanê cinîyan dest pê gureyî kerd. Dezgehê ciwanan û kulturî qefilnayî herinda ci dezgehê ke verê asimîlasyonî akenî, akerdî. Peykerê Ugur Kayamazî ke semedê şarê kurdî bîyo sembolêk wedarit. Hêrişê kultur û vîrê ma kenê. Şaredarîya qeyûmî wazena Mêrdînî asîmîle bikero û şarê ma helqê ci ra raqilno. Heme îdarekarê qeyûmî bajaranê sey Çorum û Yozgatî ra ameyî. Mîyanê înan de leşker û polîsê verênî zî estê. Rîyê îdarekerdişê xirabî û rantî yê şaredarîyanê qeyûmî ra înanê ke rayê xo dayê AKPyî zî hetê partîya mi de ca genê û vera qeyûmî tewir genê. Şaro ke texrîbatê qeyûmî vîneno AKPyî ra keweno dûrî û verê xo dano HDPyî. Şar yeno ma rê îtîraf keno. Ma çapemenîya herêmî ra zî înan eşnawenê. Dezgehê çapemenîye ke tim reklamê AKP û qeyûmî kenê, vanê ê hinî nêeşkenê raştîyan binimnê la seba ke yenê tehdîtkerdene mecbur wîna nusenê.''