Qeyûmê verênî yê Amedî Cumalî Attîla Amed de di projeyî kerdî. Nê projeyî hetê qeyûmê bînî Hasan Basrî Guzelogluyî ra ameyî rijnayene. Dima qeyûmê 3. Munîr Karalogluyî nê projeyî dewr girewtî. 

Qeyûm Attîlayî Yenîşehîr de Keyeyê Meymanan de projeyê hemşaredaranê BDPyî yê ê çaxî rijna û rixmê rexneyan zî proje goreyê xo viraşt. 

Qeyûmanê Amedî heta nika di projeyî rijnayî û newe ra kerdî. Malîyetê îhaleya projeyêkî 1 mîlyon û 857 hezar TL bi. Malîyetê projeyê bîno ke bi rayîrê dewetî virazîya, nêzanîyeno.

Aqîbetê Keyeyê Meymanan Camîyê Melîk Ahmetî de zî xo mojna ra. Qextê qeyûmî de camî bi kerrayanê şenikan restore bi. La camî de dima pêro kerrayî herinda xo ra vejîyayî û awe kewte camî. 

Endamê Meclîsê Şaredarîya Amedî Mehmet Şaban Karataşî da zanayene ke nê projeyê ke vera rijîyenê qestî ra yenê kerdene.  Karataşî vat: ''Nê qeyûman bi malzemeyanê xiraban projeyî kerd ke birîjê. Dima ke rijîyayî reyna îhaleyî akerdî. Nê pêro îhale û projeyî seba ke tay fîrmayî pereyan qezenç bikerê ameyî caardene. Selçuk Mizrakliyî nê qeyûmî teşhîr kerdbî. ''