Wan û qezayanê ci de kerdişê bêusûlî yê qeyûmanê dewleta tirke nêqedîyenê.

Qeyûmê Şaredarîya Rêya Armûşê ya Wanî Îhsan Emre Aydin şaredarîye de terefgîranê îqtîdarê AKP-MHPyî ca keno. Eşkera bi ke qeyûm Aydinî bi hawayêkê nimiteyî Mudirîya Karanê Komelkî û Kultulan û Mudirîya Qelema Taybete de kadroyê AKPyî ca kerdê.

Goreyê agahîyan 5 kesî sey personelanê şaredarîye ameyî tayînkerdene ke nînan ra yew zî Îdarekarê AKPyî yê Wanî Caner Aygun o. Aygun waştişê Serekê AKPyî yê Wanî Kayhan Turkmenogluyî ser o sey Mudirê Karanê Komelkî û Kulturelan tayînê Şaredarîya Rêya Armûşî ameyo kerdene.

Goreyê îdîayan qeyûm Aydin mîyanê nê hewteyî de zî do 12 kadroyanê AKPyî şaredarîye de ca bikero.