Fermandarîya Pêroyî yê Hêzanê Sûrîyeya Demokratîke (QSD) derheqê rewşa peyêne ya şerê Hesekê de eşkerayîyêke daye û agahîyê hîrayî dayî.

Eşkerayîye wina ya:

''Hêriş û gefê dewleta tirke yê vera herêmanê ma bi çetinî dewam kenê. Seke zanîyeno SÎHAyanê dewleta tirke Kobanê de 6 ciwanê ma şehîd kerdbî, dima zî hêrişê dewleta tirke yê vera Eyn Îsa, Zirgan û Til Temirî zêdîyabî. Hêzanê ma vera nê hêrişan xoverdayîşêko pîl kerd û şarê ma pawit. Nê prosesî de cerganê DAÎŞî hêrişê Zîndanê Sinaa yê Hesekê kerd. No zîndan zîndano tewr pîl ê herême yo ke cergê DAÎŞî tede tepişîyenê. No zîndan têna seba herêmanê ma nê seba asayîşê pêro dinya tehluke yo.

Goreyê îtîrafanê tay cergan nê hêrişan de tewr tay 200 cergan ca girewto û nê cergî taxa Xiwêran de ca bîyê. Amadekarîyanê 6 mengan ra dima 20ê çeleyî de saete 19.30 de bi wesayîtanê bombabarkerdeyan hêrişê zîndanî ame kerdene. Zîndan de zî cergan hêrişê karmendanê ma kerd. Derheqê aqîbetê nê karmendan de hema zî agahîyê hîrayî nêameyî destvistene. Xîretê cergan bi giranî bênetîce bi la tay cergî eşkayî ke xo biresnê kişta zîndanî, Fakulteyê Îqtîsadî. Labelê hêzanê ma dormeyê zîndanî girewt binê kontrolî. La şero esas o çetin teber de ame kerdene. Hem taxa Xiwêranî de hem zî taxa Heyî Zuxûrî de û hem zî warê Panaroma de pêkewtişê çetinî qewimîyayî û heta nika zafê nê hucreyanê hêrişkeran ameyî tasfîyekerdene. Taxa Xiwêrainî de hem sixinaxê înan ê nimiteyî û hem zî çekê înan ê giranî ameyî destvistene.

Netîce de zîndan nika binê kontrolê hêzanê ma de yo û tedbîrê hewceyî ameyî girewtene û xîretê înan ê remayîşî ameyî pûçkerdene. Hetê bînî ra nika hêzê ma xîret kenê ke zereyê zîndanî bigêrê binê kontrolî. Labelê ma texmîn kenê ke hema 2-3 hucreyê înan taxa Xiwêranî de mendê û coka tîya de operasyon dewam keno.

Nê şerî de 2-3 rojan de tewr tay 150 cergê hêrişkerî û 15 cergê ke waştêne biremê ameyî kiştene. Bi temamî 175 cergî ameyî kiştene.

Nê şerê 3 rojan de 27 şerwanê ma yê çêrî zî şehîd bîyî.

Operasyonê pakîkerdişî dîya destpêkerdene

Nika rewşe binê kontrolî de ya û ma dest pê operasyonêkê hîrayî yê pakîkerdişî kerd. Vera hucreyanê nimiteyan ê DAÎŞî Hesekê, Reqa û Dêra Zorê de bi hezar şerwanan dest pê operasyonê pakîkerdişî kerd.

Nê 3 rojan de hêzanê ma yê QSDyî, hêzanê asayîşî û HPCyî çêrî û jîhatîya pîle mojnaye. Hêzanê Koalîsyonê Mîyanneteweyî zî bi hawayêkê aktîfî hetê hêzanê ma de ca girewt.

Ma şarê Xiwêran û Hesekê rê zî sipas kenê ke hetkarîya ma kerde. Ma zî şarê xo rê reyna ney wazenê. Hêzê ma nika bi baldarî têgêrenê ke zerar nêreso sivîlan ser.

Ma sey QSDyî qerardar ê ke vera DAÎŞî şerêkê pîlî bikerê û dinya na bela ra bixelisnê. Goreyê îtîrafanê tay cerganê ke mesuldarê înan hetê Tirkîya û herêmanê îşxalkerdeyan ê sey Serêkanîyê de wazenê cergan biremnê. Qismêkê nê cergan zî hetê Ramadî yê Iraqî ra ameyo. No balkêş o ke nê wextî de hêzê ma DAÎŞî de meşgul bibi, xeta Eyn Îsa de hêzê dewleta tirke ya îşxalkere û cerganê ci hêrişê baregeh û mewzîyanê ma kerd û bîyî sebebê şehadetê 3 embazanê ma. Xeta Til Temir û Ebu Rasênî de zî kombîyayîş û hêrişê înan estê. Hemwextîya nê hêrişan û hêrişî DAÎŞî pîya manadar a. Labelê sey hêzanê QSDyî ma heta nika senî ke herêmê xo û şarê xo bi fedakarî pawitî nika ra dima zî ma do înan bipawê.''