Fermandaranê Yewinanê Pawitişê Rojhelatê Kurdîstanî (YRK) ra Şîyar Şevgerî bi wesîleya serrgêra Komployê Mîyanneteweyî yê vera Rayberê Şarê Kurdî Abdullah Ocalanî ANFyî rê qisey kerd.

Qiseykerdişê Şevgerî ra beşêk wina yo:

''Îşxalkeran seba ke çin bikerê verê xo da xoverdayîşê kurdan. Wexto ke babete bena kurdan îşxalkerî zî benê yew. Seke Komara Kurdîstanî ya Mahabadî de bi Qazî Mihemed û xeylê rayberê kurdan ameyî çinkerdene. Kurdî tarîx de tim maruzê hêrişan bîyî. Têgêrayîşê Azadîye nê serebûtan ra xo rê dersî vetî û pê fikr û felsefeya Rayber apoyî têkoşîn aferna. Ewro reyna hêzê îşxalkerî wazenê kurdan çin bikerê. Çunke têgêrayîşê azadîye û şarê kurdî têkoşîn da destpêkerdene û îşxalê Kurdîstanî qebul nêkenê. Dişmen çend biwazo têgêrayîşê azadîye çin bikero zî do ser nêkewo.

Îşxalkerî nika zî wazenê sey rayberanê bînan ê kurdan Rayber Apoyî zî çin bikerê. Coka înan Komployo Mîyanneteweyî ard ca. La ne Rayber Apo ne zî têgêrayîşê azadîye ameyê çinkerdene. Eqsê ci wirdî zî bîyê bihêzêr. Rayber Apoyî pê xoverdayîşê xo yê Îmraliyî planê îşxalkeran û komplogeran pûç kerdî. Têgêrayîşê Apogîran zî dersê xo girewtî, kêmasîyê xo dîyî û qelsîyê analîz kerdî. 15ê Sibate seba şaranê Kurdîstan û Rojhelatê Mîyanênî roja reş a. Komployê 15ê Sibate de rolê pêro hêzanê îşxalkeran esto. Înan armanc kerd ke şexsê Rayber Apoyî de pêro kurdan çin bikerê. La şarê kurdî îşxalkerî bin kerdî. Şarê kurdî xoverdayîşêko bêhempa kerd. Wexto ke Rayber Apo tepişîya xoverdayîşo tewr pîl Rojhelatê Kurdîstanî de qewimîya. Nê xoverdayîşî de bedelê pîlî ameyî dayene, şehadetê girîngî qewimîyayî. Ma nê şehîdanê xo zî bi rêzdarî yad kenê.''