Rewşa Yagizî her ke şina giran bena
Grevê vêşanîye yê bêdem û bêagêrayîşî yê Nasir Yagizî roja 126’ine de dewam keno. Her ke şino rewşa ci xirabêr bena.
Grevê vêşanîye yê bêdem û bêagêrayîşî yê Nasir Yagizî roja 126’ine de dewam keno. Her ke şino rewşa ci xirabêr bena.
Grevê vêşanîye yê bêdem û bêagêrayîşî yê Nasir Yagizî yê vera tecrîdê serê Rayberê Şarê Kurdî Abdullah Ocalanî roja 126’ine de dewam keno, her ke şino rewşa ci xirabêr bena.
Hetê bînî ra grevê vêşanîye yê bêdem û biagêrayîşî yê Temsîlkarîya HDP’yî yê Başûrê Kurdistanî roja 126’ne de bi gruba 3’ine dewam keno.
Yagizî derheqê rewşa weşîya xo de û çalakîyanê grevî de zanayîşî dayî ANF’yî û vat: “Persê weşîye roje bi roje giran benê. Rojanê peyênan de bêhalîye û bêtaqetîye zaf bîye zêde. Reyna estikê leşa mi bi taybet ê linganê mi zaf dejenê.”
Yagizî ard ziwan dêjê çimanê ci girantir bîyê û o roje teyna eşkeno 3 saetan bikewo ra.
Nasir Yagizî bale ante serê sewîyeya çalakîyan a ke reşta ci û vat, “Şarê Kurdî bi xoverdayîş estbîyayîşê xo dewam keno, hemrayanê ma bi çalakîyanê xo yê fedaîyan rîpelanê tarîxî de cayê xo girewt. Ma deyndarê înan ê. No adirê xoverdayîşî ganî bêro xurtkerdene.
Yagiz 26'ê Sibate roja 98'ine de seba giranbîyayîşê rewşa ey a weşîye ame berdene bi Nêweşxaneyê Parî, kontrolanê doktoran ra dima Yagizî tedawî red kerdebî û xoverdayîşê xo dewam kerdibi.
Serdanê paştdayîşî dewam kenê
Seba paştdayîşî bidê çalakîye, heyetêk Cimatê Pêroyî yê Îslamîya Kurdistanî ra ameyî serdana Temsîlkarîya HDP’yî ya Hewlêrî. Serdane de heyetî paştdayîşê xo yê seba grevê vêşanîye ard ziwan.
Serdane de bi nameyê heyetê Serekê Cimatê Pêroyî yê Îslamîya Kurdistanî Hafiz Ehmedî qisey kerd. Ehmedî vat: “No 40 serrî yo Rayberê Şarê Kurdî Abdullah Ocalan seba heqanê şarê Kurdî têkoşîn keno. Nika Ocalan mîyanê tecrîdê girankerdeyî de yeno girewtene. No zî vera heme qanûnan û heqanê merdiman o.”
MEXMÛR
Çalakîya grevê vêşanîye ya ke 16’ê Kanûne 2018’î ra nata kampa Şehîd Rustem Cûdîyî ya Mexmûrî de seba wedaritişê tecrîdê girankerdeyî yê serê Rayberê Şarê Kurdî Abdullah Ocalanî ameyebî destpêkerdene roja 100’ine de dewam kena. Çalakîye bi gruba 34’ine dewam kena.
Hetê bînî ra grevê vêşanîye yê bêdem û bêagêrayîşî yê endama Koordînasyonê Meclîsê Îştarî Fedîle Toke zî roja 66’ine de bi qerardarîye dewam keno.
SILÊMANÎ
Grevê vêşanîye yê Komela Karkeranê Mezopotamya ya Silêmanî yê vera tecrîdê Rayberê Şarê Kurdî Abdullah Ocalanî roja 130’ine de bi gruba 52'ine dewam keno.
Gruba 52’ine, hetê çar kesanê ke her yew parçeyêkê Kurdistanî ra tewrê ci bîyo ameye dewrgirewtene.
Çalakîya grevê vêşanîye yê bêdem û bêagêrayîşî ya Herêm Mehmudî roja 31’ine de dewam kena. Hetê bînî ra çalakîya Şeyma Ednan a seba mengêk dest bi grevê vêşanîye kerdibi roja 24’ine de ya.