Dogan Amedo ke Herêmanê Pawitişî yê Medya de rojnamegerîye keno, ANFyî rê qisey kerd û ard ziwan ke xoverdayîşê Garê serkewtişêko tarîxî yê şar û gerîlayan o.

Dewleta tirke ya îşxalkere 10ê sibata 2021î de bi operasyonêkî waşt ke Garê zî tede xeylêk warê Herêmanê Pawitişî yê Medya îşxal bikera û 13 esîrî destê gerîlayan ra bigêra. La netîceya operasyonî de 12 leşkerê esîrî û hemwelatîyêkê Başûrî yo esîr û 14 gerîlayê HPGyî bi çekanê kîmyewîyan ameyî şehîdkerdene.

Serrgêra xoverdayîşê Garê de rojnameger Dogan Amedî cewab da persanê ANFyî.

Doganî pare kerd ke Erdoganî bi armancê qirkerdişê pêro kurdan 2015 de şer dayo destpêkerdene. Doganî vat: ''Nê wextî ra pey dewlete vera kurdan û gerîlayan dest pê şerêkê pîlî kerd la reyna zî pê gerîlayan nêeşkaye. 2021 de dewleta tirke planêko pîl kerd. Înan waşt esîran bixelisnê û merkezê gerîlayan îşxal bikerê. Înan 7 mengan amadekarîye kerde, PDK û MÎTî îstîxbaratî arê dayî. La dewleta tirke hêzê gerîlayan xo vîr a kerdbî. Averşîyayîşanê HPGyî zî xoverdayîş resna leweyê tewr berzî. Bi nê hawayî Garê de dewleta tirke derbêka pîle werde.

Garê seba rejîmê Erdoganî bi goristan çunke gerîlayan tede bi fedayîtî xo ver da. 4 rojan dewleta tirke pêro teknîkê xo şuxilnayî û bi namerdî çekê kîmyewîyî şuxilnayî. La îradeyê Apogîran serkewtiş ard. Gerîlayan rayberîya Şoreş Beytuşebabî de qetî kerd ke xoverdayîş bêbedel nêbeno. Xoverdayîşê Garê zaf netîceyê girîngî vetî werte. Gerîlayan pisporîye viste destî, metodê neweyî bingeyê îradeyê Apogîran de aver şîyî, mîyanê kurdan de hîsê neteweyî zêdîyayî. Şarî reyna dî ke dişmen çend hêriş bikero zî nêeşkeno gerîlayan çin bikero. Eqsê ci gerîlayî bihêzêr bîyî û bawerîya şarî ya bi PKKyî xurtêr bîye. Gerîlayan xora 2015 ra dima vera hêrişanê teknîk-teknolojîkan perwerdeyî dîyî, metodî vetî werte. Garê de gerîlayan hînî bi terzê tîman xo rêxistin kerd. Gerîlayan metodê cîyayî şuxilnayî û çalakîyê serkewteyî kerdî.

Dewleta tirke hetkarîya mîyanneteweyîye reyde operasyonê Garê de asta cidîye de PDKyî ra hetkarîya îstîxbarat, lojîstîk, propaganda girewte. Eke dewleta tirke Garê de ser bikewtêne vera kurdan qirkerdişê neweyî do biameyêne kerdene, Başûrê Kurdîstanî îşxal bikerdêne. Gerîlayan pê serkewtişê Garê verê tehlukeyêkê pîlî girewt. Garê de kurdan, dewlete, pêro hetanê sîyasîyan û warê mîyanneteweyî dî ke gerîlayî do bin nêkewê. Dewlete çend bihêz biba zî vera PKKyî de neçare ya ke bin bikewa.

Xoverdayîşê Garê xoverdayîşêko tarîxî bi. Netîceya xoverdayîşê Garê de dewleta tirke Herêmanê Pawitişî yê Medya de bin kewte. Zendûra, Mamreşo, Girê Sor, Werxelê û pêro waran de gerîlayan bi ruhê Garê dewleta tirke bin viste. Ganî her kes goreyê na raştîye têbigêro. Gerîlayanê azadîye Garê de verê qirkerdişê kurdan girewt. Gerîlayan bi xoverdayîşê xo no mesaj da 'Erdê Kurdîstanî binê linganê îşxalkeran de çin nêbeno.' ''