Endama Koordînasyonê PAJKî Ronahî Serhad tewir û çalakîyê cinîyan ê 8ê Adare ANFyî rê ercnayî. Qiseykerdişê Ronahî ra beşêk wina yo:

''Ez verî 8ê Adare yê Rayber Apoyî, Emîne Şenyaşar û pêro cinîyan fîraz kena. Cinîyan vera ğêro hêrişanê cînsîperestan, neteweperestan, dînperestan, qirkeran û faşîstan ê serdestîya camêrdan cewabêko heybetîn 8ê Adare de da. Çalakîyanê 8ê Adare moralêko pîl da komelî û şaran, bi nê hawayî têkoşîn resa astêka newîye. Têkoşînê cinîyan 2021 de vera nê hêrişan xo ver da, ser kewt û serkewtişê xo bi 8ê Adare tacîdar kerd.

Îradeyê têkoşînî yo ke 8ê Adare de newe ra vejîyayo werte nika ra serkewtişê 2022î dîyar kerd, rayîrê serkewtişî mojna. Kokiman ra bigêrê heta ciwanan, cinîyê kurd, tirk, ereb, sûryanî û tirkmenî 8ê Adare de herikîyayî waran û înan dersêko tarîxî da îqtîdarê AKP-MHPyî. Îqtîdarê AKP-MHPyî tarîxê Tirkîya de sey îqtîdarê dişmenê şar û cinîyan, îqtîdarê zorbazî şinasîyeno. Tek alternatîfê nê îqtîdarî cinî yê. Cinîyan bi bernameyê têkoşînî yê 'Wext wextê azadîye yo', bi şîarê 'Cinîye, Cuye, Azadîye' têkoşînê 2022î pêşwazî kerd. Cinîyî pê rêxistinîya xo bawer ê, bi hawayêkê stratejîkî nêzdîyê yewîya têkoşînî, rêxistinîye û pawitişî benê. Cinîyan ra ber çew wayîrê nê hêzî nîyo.

8ê Adare tarîxê serewedaritişî yo. Tarîxê merdimîye yê seserra 21. do bi têkoşînê cinîyan bêro îfadekerdene. Coka 8ê Adare têna şayîyêke nîyo, pawitişê estbîyayîşê cinîyan o, serewedaritişê caardişê azadîye yo. Cinîyî aktorê vurnayîşê komelî yê, hêzê tewr şorişgêrî yê dînamîk ê. Ame îsbatkerdene ke Kurdîstan de cinîyî hêzê komelkî yê, herême û dinya de zî vera sîstemê camêrdan hêzê bitesîr ê. Cinîyî hînî sîstemê serdestîya camêrdan ra çîyêk nêwazenê û komelêkê neweyî afernenê.

Wextê ci ameyo ke vera polîtîkayanê serdestîya camêrdan cinîyî çalakîyanê hîna bitesîran bivisnê dewre. Coka Hemleya 'Wextê Cinîyan' xeta têkoşînê 2022î dîyar kena. 8ê Adare de berzbîyayîşê azadîye, bawerîya têkoşînî, hêvîyê xurtî vejîyayî werte. 8ê Adare de cinîyan reyna soz da ke do sîstemê Îmraliyî parçe bikerê û Rayber Apoyî azad bikerê. Cinîyî bi şîarê Wextê Cinîyan o do azadîya Rayber Apoyî sey azadîya cinîyan biresnê Newroze. Ma nika ra Newroza Rayberîye û pêro cinîyan zî fîraz kenê.''