Polîtîkaya şerî ya îqtîdarê AKP-MHPyî bi zeman û krîzê ekonomîkî agêrena şarî. 

Vakurê Kurdîstanî û Tirkîya de vayê tay berheman se ra 700 zêdîyayê. Bi zemanê zêdeyan şaranê Vakurê Kurdîstanî û Tirkîya rê vêşanîye yena ferzkerdene. Roniştoxanê Wanî derheqê babete de ANFyî rê qisey kerd û vera ney nêrazîbîyayîşê xo mojna.

Cengîz Akinî vat: ''Tirkîya 7 serrî yo şer kena. Nê zemî zî netîceyê nê şerî yê.  Mazot bîyo 25 lîra. Gelo citkarî senî erdê xo biramê? Mesuldarê ney hukmat o. Her ke şino ekonomî bena xirabêr. Yew pêleka ardan bîya 400 lîra, yew teneke rûnî bîya hezar lîra. La ê bi qalanê zûran kenê ke şarî bixapînê.''

Turan Karacayî zî ard ziwan ke o heta ke Çelebîbagî ra resa Wan mazotê bi 100 lîrayan qedîyayo. Karacayî vat: ''Par pê nê pereyê mazotî ez eşkayêne tîya ra şora Çewlîgo ke 320 kîlometreyan dûr o, û abigêra. Vaya rûnî zî heman a. Nê zemî hînî bîyê zulm. Kamî welatî îdare kenê ê mesuldarê na rewşe yê. Ez 55 serre ya, mi hende zemî emrê xo de nêdîyê. Merdim nêeşkeno hînî debara xo bikero.''

Mustafa Demîrî vat: ''Faturaya ceyranî 2 hezar 600 yena. Ez di kesan xebitnena la kar zî çin o. Merdimî hînî nêeşkenê wesayîtê xo biramê. Sotemenî bîya vaye. Esnafî pêrişan bîyê. Ma hînî nêeşkenê lazimîyanê keyeyê xo peyda bikerê. Şar zehmetî anceno. Ma nêzanenê senî îdareyê xo bikerê.''