Hemsereka DBPyî Salîha Aydenîz ANFyî rê qisey kerd û qala ci kerde ke kurdî hînî statu wazenê.

Salîha Aydenîze ard ziwan ke kurdan têkoşînê xo ra fek vera nêda û ê wextêkê nêzdîyî de eşkenê destkewteyanê xo bivurnê statu, kongreya xo ronê. Aydenîze vat: ''Şarê ma tim waştêne ke DBP xo hîna rêxistin bikero û zemînê xo yê mîyanê komelî hîna xurtêr bikero. Ma no mîsyon kongreya xo ya yewine de girewt xo ser û bire daye ke nînan bîyarê ca. Ma kongreya xo ya 6. de nê esasî ser o şarê xo reyde ameyê yewca. 

Şarê kurdî qetî azadîye, Rayberîye, ziwan, kultur û cografyaya xo ra fek vera nêd.Şarî bi şîar û tewirê xo kongreya ma de no mojna. Coka nê rojdemê ma yê. Şarî kongre de waştişê xo bi zelalî îfade kerdî.HDP partîya şaranê Tirkîya ya. HDP nika karê stratejîya Rayîrê 3. keno. Ma zî na babete de erk û mesuldarîyanê xo do bîyarê ca.Vera DBPyî hêrişê sîstematîkî estê, kadro û sîyasetmedarê ma bi operasyonan tepişîyenê. Kongre de şarî mojna ke vera nê hêrişan têkoşîn do dewam bikero.''

Aydenîze pare kerd ke şarê kurdî do qetî sîyasetê demokratîlî ra fek vera nêdê û vat: ''Erk û mîsyonê DBPyî yo ke azadîya Abdullah Ocalanî bîyaro ca û seba ney têkoşîn bikero. Sey se serran verî ewro zî vera kurdan polîtîkayê qirkerdişî yê dewlete estê. Dewlete wazena destkewteyanê kurdan çin bikera. 2014 de Planê Çokdayîşî nê armancî ser o ronîya. Reyna vera kurdan polîtîkayê şerê taybetî estê. Şarê kurdî vera nînan qetî sereyê xo nêard war û do nêaro.

Şarê kurdî wayîrê statu, ziwan, kultur û Rayberê xo vejîyeno. Mesuldarîya ma ya ke ma nê wayîrvejîyayîşî xurtêr bikerê û polîtîkayêke awan bikerê. Ma do nê esasî ser o karê xo bikerê. Ma wextê winasênî de ke mekanîzmayêk awan bibo ke destkewteyê kurdan vurîyenê statuyî. Kurdî hînî nêwazenê sey verî bimanê. Ma do waştişanê şarê kurdî bi zelalî bîyarê ziwan û na çarçewe de bixebitê.''