Kongreya 3. ya Meclîsê Ciwanan a HDPyî Amed de salonêka qezaya Peyasî ya Amedî de yena kerdene. Îstanbul, Anqara, Îzmîr ûsn xeylêk şaristanan ra bi hezaran ciwanî tewrê kongre bîyî ke bi şîarê 'Nika wextê ciwanîye yo' yena kerdene.

Ciwanî serê sibayî hetê polîsan ra maruzê kontrolî bîyî. Ciwanan kongre de sloganê sey 'Ma do pê xoverdayîşî ser bikewê', 'Biciwîyo xoverdayîşê zîndanan' vatî, govende girewte. Kongre de verî mesajê ke têgêrayîşanê ciwanan ê dinya şawitbî kongre ameyî wendene.

Verî Vervatoxa Meclîsanê Cinîyan ê HDPyî Ayşe Acar Başaran qisey kerd û vat: ''Salonî ma rê nêvejîyenê. Ciwanan ewro tewirê xo yo qerardar mojna îqtîdarî. Polîtîkayê nîjadperestî, neteweperwer û qelskerdişî yê îqtîdarî do ser mekewê. Ciwanê ma do ameyoxê ma awan bikerê.''

Dima Hemsereka DBPyî Salîha Aydenîz qisey kerd û vat: ''Na kongre mesajêkê pîlî dana. Birêz Ocalan binê tecrîdî de yo û no tecrîd ewro pêro welatî ra vila bîyo. Birêz Ocalan xeta sûre ya ciwanan a. Ganî cade bêro veradayene. Ma do heta peynî seba azadîya Ocalanî bixebitê. Çunke o ameyoxê şaranê Rojhelatê Mîyanênî yo.''

Hemserekê HDPyî Mîthat Sancarî zî kongre de qisey kerd û vat: ''Ciwanî hê payan ser ê, HDP ho payan ser o. Ê seba ke komelî teslîm bigêrê ciwanan kenê hedef. Qet xem mekerê. Ma do ser bikewê çunke ma heqdar ê, çunke ma xo ver danê. Rejîmê qeyûmî polîtîkaya teslîmgirewtişê ciwanan o. Têkoşînê vera nê rejîmî ganî bêro geşkerdene. Şima ciwanê ke çar hetanê welatî ra ameyî tîya do meseleyanê ma çareser bikerê. Ma hedefê xo sey îtîfaqê demokrasî vet werte, şima do rayberîya ney bikerê. Şima do rayîrê îtîfaqê demokrasî abikerê.

Nika zîndanan kenê cayê mergî, îşkencexaneyan. Armancê înan eşkera yo. Ê wazenê îradeyî bişiknê û teslîm bigêrê.  Ma do rayraşîyayîşê haştîya pîle qetî ser bivisnê. Tecrîd nê rayîrî asteng keno. Armancê tecrîdî astengkerdişê haştîye yo. Tecrîd sîmgeyê girankerdişê polîtîkayanê şerî yo. Coka nê rayraşîyayîşê pîlî yê haştîye de ciwanî do rayberîye bikerê.''