7ê teşrîna peyêne ya 2018î de rayberîya Hemsereka KCDyî Leyla Guven de vera tecrîdê serê Rayberê Şarê Kurdî Abdullah Ocalanî grevê vêşanîye dîyabi destpêkerdene. Grevê veşanîye cade mîyanê tepişteyanê dewaya PKK û PAJKî de vila bibi. Mengêke ra dima 30 tepişteyan grevê vêşanîye vurna rojeyê mergî. Çalakîye roja 200. de dima ke avûkatanê Buroyê Asrinî Ocalanî reyde pêvînayîş kerd grevê vêşanîye qedîya. Nê 200 rojan de vera tecrîdê Îmraliyî çalakîyê fedayî ameyî kerdene. Çalakîkero verên zî Zulkuf Gezen bi.

Gezen Zîndanê Tekîrdagî de roja 17. ya grevê vêşanîye de çalakîye kerde. Polîsan cenazaya ey remnaye û berde Amedî. Seba ke cenaza bi lezî bêra definkerdene keyeyê Gezenî rê gef ame wendene. Gefanê polîsan ra cenaza bêmerasîm ameye definkerdene. 

Keyeyê Gezenî Amedî ra yo û Sûr de maneno. Dadîya Zulkufî Havva û babîyê ci Şeyhmus Gezen domanê xo mîyanê şert û mercanê giranan de pîl kerdî. Domanan wexto ke bîyî pîlî xîret kerdêne ke hetkarîya debara keyeyî bikerê. Zulkuf zî hetêkî ra xebitîyayêne û hetêkî ra zî şîyêne dibistane.

Dadîya ci Havva Gezen wina qala lajê xo Zulkuf Gezenî kerde: ''Zulkuf û birayê ci xebitîyayêne. Pere hem dayêne ma hem zî seba dibistane şuxilnayêne. Her kesî Zulkufî ra hes kerdêne, ci rê hûrmet kerdêne. Zulkuf lîse de eczane de dest bi karî kerd. O çax xo rê gîtarêke zî hêrînaye û şîyêne Merkezê Kulturî yê Dîcle-Firatî. Zulkuf uca de bi wayîrê nasnameyê polîtîkî. Zulkufî wextê Serewedaritişê Amedî yê 2006î de têkoşînê xo eşkera kerd. Cîranê ma hema zî qala fedakarîya ey kenê. Zulkufî merdimanê xo ra şarê xo ra hes kerdêne.''

Zulkuf Serewedaritişê Amedî ra dima 40 rojî tepişte mendî û dima vera dîya. La serrêke dima 2007 de reyna tepişîya. Zulkuf bi nê hawayî 12 serran tepişte mend. Dayîke Havva vat: ''Wextê pêvînayîşî de rixmê halê xo ey moral dayêne ma. Wexto ke ma şîyêne Gîresun û Tekîrdag şarê ucayî seke ma cinawir ê ewnîyayêne ma. Seba ke ma kurd bîyî xo nêzdîyê ma nêkerdêne. Wexto ke ma Zulkuf dîyêne pêro çi xo vîr a kerdêne.

Wextê grevê vêşanîye de ma 15 rojan de rayêke telefon de qisey kerdêne. Şehadetê ci rê çend rojî verî ey mi rê telefon kerd û bi hîsgerî mi de qisey kerd. Mi fam nêkerd. Seba xatirwaştişî telefon kerdbi. Rojêke înan xebera şehadetê ey daye ma, ma bawer nêkerd. Ma zîndanî rê telefon kerd û musayî ke xebere raşt a. Cenazaya ci bi lezî remnaye Amedî. Polîsan venga mêrde û lajanê mi kerd û waşt cenaza senî resaye Amed cade bêra definkerdene. Ma vat ma do serê sibayî defin bikerê. La polîsan vat eke ma bi lezî defin mekerê ê do hêriş bikerê. Xora cenaza destê înan de bîye, ardêne Amed. Înan cenaza arde goristan, nêverda ma wecîbeyanê dînîyan bikerê, merdimê ma bêrê serê gorî. Wexto ke dûa kerdêne polîsan vat 'Lez bikerê, ma nêeşkenê pabeyê şima vinderê.' Xûlasa înan cenaza remnaye, ma rê gef wend.''

Şehadetê Zulkuf Gezenî ra dima Aytene Beçet, Zehra Saglam, Medya Çinar, Yonca Akici, Sîraç Yuksek, Mahsûm Pamay, Umît Acar û Ûgûr Şakar zî çalakîyê fedayî kerdî.