Seba ke îqtîdarê AKP-MHPyî çimeyanê welatî seba şerî xerc keno her roje krîzo ekonomîk, vêşanîye û bêkarîye zêdîyenê. Şarê Tirkîya û Vakurê Kurdîstanî sînorê vêşanîye de ciwîyenê.

Amedijan derheqê tesîranê vaykerdişan û krîzê ekonomî de ANFyî rê qisey kerd.

Serkan Kaya: ''Ez pê 200 TL xo devirnena. Verî ma pê 5-6 poşetan şîyêne keye, nika ma pê yew poşetî zî nêeşkenê. Faturaya ceyranî 700-800 TL ya. Nê pêro sûcê sîstemî yê, ê nêeşkenê îdare bikerê. 20 serrî yo ê îqtîdar ê la çîyêk nêvurîyayo. O qesra xo de ronişeno, xemê ci nîyo ke kam vêşan o!''

Şehnaze Ezer: ''Her çi zaf bîyo vay. Yew kîloyê firingan 15-20 lîra yo. Ez bazarî ra destveng agêrena. Her roje zî zemî yenê. Faturaya gazê ma yê xozayî 500 lîra ya. Cara kar zî çin o. Ma karê tûtinî kerdêne la o zî bi qedexe. Ganî îdarekarî hînî goş bidê şarî, bibê wayîrê wijdanî.''

Serdar Tan: ''Ez bi serran o karê îşporta kena. Ewro ma nêeşkenê pê yewmîye xo bidevirnê. Verî ma pê yewmîyeyê xo hem kerge hem zî hetê ci de çîyê bînî hêrînayêne. Ma bi zorî faturayanê xo danê. Beno ke ma aşmêne înan zî medê. Keye de aramî nêmenda. Vera nîqaş û qesawetê ameyoxî estê.''

Polat Durmuş: ''Ez esnaf a. Ekonomî zaf xirab a la îdarekarî vanê zaf hol a. Nê bazarî de xeylêk dikanî ameyî qefilnayene. Hînî hêvîya ma nêmenda. Edalet çin o. Ez nêeşkena ameyoxê xo bivîna. Nika ra înan ameyoxê ma çin kerdo.''

Alî Îhsan Adivar: ''Krîzê ekonomîkî zaf tesîrê ma kerd. Coka komel hînî çimê xo abikero û goreyê ney tewirêkî bigêro. Vêşanîye û krîz benê pîlêr, merdimî xo kişenê la îqtîdar vera ney bêveng o.''