Abdurrahîm Saridag Çelîg de heywankarîye keno. Seba serdanêk şino Xarpêt û ûca karê serawanîye vîneno. Dimayo ke Xarpêt de karê serawanîye vînenê o zî dest bi nê karî keno. Çar serran verî dest bi remitişê sebzeyan keno. Nika birayê xo dir nê karî keno û 5 donimî xîyarê sera remitê. Bi na sera bi mirdîya hemeyê Çewlîgî xîyaran arê danê.

Saridagî qalê karê xo yê serawanîye kerd û wina vat: “Embazanê mi Xarpêt de karê serawanîye kerdêne û bala mi zî ante û mi dest pêkerd. Ez zî şîya mudurîyetê zîretî, mi muracat kerd û dest bi remitişî kerd. Karêko demderg o û berê ci zêde yo. Remitişê ci rew dest pêkeno û erey qedêno. Naye ra mi waşt ke karê serawanîye bikerî.”

Saridagî da zanayene ke ê serrewextê wisarî de dest bi remitişî kenê û menga ewilêne ê sera ra nêvejênê û ewnênê ci ra. Saridagî vat ê menga ewilêne de beranê xo nêweşîyan ra pawenê û menga ewilêne de dermananê zîraîyan nêdanê înan. Saridagî vat ke ê rojêk de tonêk xîyar 5 donimanê ke ê û birayê xo pîya remito ra arê danê û berê emserî goreyê serranê ravêrteyan hende rind nêyo. Saridagî da zanayene ke hem Amed û hem zî Xarpêt de emser ber kemî yo. Saridagî peynî de vat ke destekê mudurîyetê zîretî kemî yo û ê wazenê ke mudurîyetê zîretî babeta destekî de hîsdar bo.