33 serî verê cû rejîmê Saddam Huseyînî bi gazê kîmyewîyî hêrişê şaristanê Serdeştî yê Rojhelatê Mîyanênî kerbi. Hêrişî ra 33 serrî derbaz bîyî la rêçê giranî yê hêrişî şarî ser o mendî.
Ajansê Xeberan ê Fransizan AFPyî bale ante ser ke 33 serran ra dima hema zî bedenê roniştoxanê Serdeştî de rêçê gazê Xerdelî estê û roniştoxê seba ke no qirkerdişo ke ameyo peygoşkerdene sey 'jenoside' bêro naskerdene roniştoxê Serdeştî têkoşîn kenê.
Serekê Komeleya Mexdûranê Hêrişê Kimyewîyî yê Serdeştî Salîh Azîzpûrî vat: ''Eke şer de ling û destê şima şorê şima eşkenê herinda ci de protezan pabikerê. La eke cigerê şima şorê şima senî eşkenê nefes bigêrê?''
Rejîmê Iraqî 28ê hezîrana 1987î de bi gazê kîmyewîyî hêrişê Serdeştî kerd.
Azîzpûrî vat: ''Êyê ke merdî û birîndar bîyî pêro sivîl bîyî.''
Goreyê doneyan ê fermîyan hêrişê kîmyewîyî de 119 kesî merdî, 1.518 kesî birîndar bîyî la Azîzpûrî pare kerd ke gazî tesîrê 8 hezar kesan kerd û heta nika xeylêk kesî pê merdî.
Mamosta Mahmûd Asadpûrê 50 serreyî vat: ''Ewro hema zî cigerê mi de tengîye esta û nêeşkena ra bikewa.''
Mudirê Torra Weşîya Komelkî ya Serdeştî Dr. Rojan Qaderîyî zî vat: ''Tesîrê gazî aktîf o. No tesîr cigêran xirap keno û çew nêeşkeno tira nefes bigêro.''
Leyla Marûf Zadeh wextê hêrişî de hemşîreya zerrîwaze bîye. Leyla vat: ''Dewijî nêweşxaneyan de qîrayêne û înan hetkarîye waştêne. Bedenê her kesî sûr bibi.''
Hemşîre Leyla çend saetan mexdûranê hêrişî ra hetkarîye kerde û dima bi demkî bîya kor sey citkar Resûl Malahî.
1980-1988î de şerê Îran û Iraqî 22ê êlula 1980î de bi hêrişanê rejîmê Bexdadî dest pêkerd. Saddam Huseyînî temamîya dîktatorîya xo de çekê kîmyewîyî xebitnayî.
Konseya Asayîşî ya Neteweyanê Yewbîyayeyan 1986 de vera çekanê kîmyewîyan ê şerê Iraq û Îranî tewirê xo mojna.
Vîrusê Korona seba serdeştijan tehluke yo
No gaz prosesê pandemî de zêdêr tesîrê mexdûran keno. Dr. Qederîyî vat: ''Seba ke cigerê înan zixm nîyê şansê înan kêm ê.'' Qederîyî waşt ke mexdûrî wa nêvejîyê teber.
Muhammed Zemanîyê 59 serreyî vat: ''Ma keyeyî ra qet nêvejîyenê teber seke ma qafes de yê.
Leyla Mahrûd Zadeh serra 2005î de dewaya sanayîkar Frans Van Araato ke çekî dayêne Saddamî, şahîdîye kerde. Araatî rê cezaya zîndanî ya 17 serran dîyaye.
Roniştoxê Serdeştî pê bire şa bîyî la aslê xo de zanenê ke edaleto raştikên do nêro caardene. Serdeştijî wazenê no hêriş sey qirkerdiş bêro naskerdene û sey Hîroşîma bibo sembol.
