Serê sînorê Tirkîya-Îranî de dramê multecîyanê afganan dewam keno. Multecîyî zimistanan cemidîyenê, hamnanan Gola Wanî de xeniqîyenê. Hukmatê AKPyî multecîyan vera Ewropa sey çeka şantajî şuxilneno. Dewleta tirke seba ke afganî nêrê sînorê Tirkîya dês û têlî viraştbî. Multecîyê ke sînorî ra derbaz benê zî maruzê îşkenceyê leşkeran ê tirkan yenê.

Çele de 3 multecîyî sînorî de cemidîyayîşî ra merdî. Multecîyê ke raştê îşkenceyî yenê muracatê Baroyê Wanî kenê.

Mîyanê hewteyêkî de dewa Belasurî ya Îranî de cinîyêke wexto ke di domananê xo reyde xîret kerdêne derbazê Tirkîya biba serdî ra dinyaya xo bedilnaye. Goreyê agahîyan cinîya afgane hetê leşkeranê tirkan ra ameye berdene bi serê sînorê Îranî û seba ke leşkeranê Îranî zî cinîye qebul nêkerde cemidîyaye.

Endamê Heyetê Rayberdişî yê Baroyê Wanî Mahmut Kaçanî derheqê babete de agahîyî dayî ANFyî.

Kaçanî da zanayene ke goreyê serranê bînan ameyîşê multecîyan kêmîyayo û vat: ''Multecîyî dima ke sînorî ra derbaz benê raştê îşkenceyê leşkeran yenê, dest nîyeno pere û eşyayanê înan ê qîmetînan, telefonê înan şikîyenê û serê sînorî de verdîyenê. Kesêko ke serê sînorî de engiştê linganê ci ameybî şiknayene muracatê ma kerd. Koçberan ma rê vat ke vera înan kerdişê xirabî yenê kerdene.''

Kaçanî vat: ''Bi taybetî zimistanan xeylêk merdimî xîret kenê ke xo biresnê şaristananê rojawanî yê Tirkîya. Xeylêk multecîyî zî sînor de mirenê. Beno ke wisar de xeylêk cesedî bêrê dîyene. Meseleya multecîyan vera bena hîna trajîk.''