Fermandaranê Hemleya Şorişgêre ya Bazanê Zagrosî Alan Mazgîrtî operasyono ke artêşa tirke 23ê nîsane de Herêmanê Pawitişî yê Medya de dabi destpêkerdene, derbê ke dîyayî dişmenî ro û taktîkê ke mîyanê şert û mercanê şerî de ameyê afernayene, ANFyî rê ercnayî.

Qiseykerdişê Malazgîrtî ra beşêk wina yo: 

''Artêşa tirke pê plansazîyanê pîlan dest pê 2021î kerdbi ke operasyonê Garê yê 10ê sibata 2021î zî nînan ra yew bi. Artêşa tirke rixmê paştdayîşê PDK û Iraqî zî nêeşkaye Garê ra netîceyêke bigêra. Dewleta tirke seba ke binkewtişê xo binimna 23ê nîsane de hêrişê herêmanê Zap, Metîna û Avaşînî yê Herêmanê Pawitişî yê Medya kerd. La nê operasyonî de zî nêeşkaye netîceyêke bivisna destî. Çunke gerîlayan metodê neweyî şuxilnayî.

Dewlete zî metodê kîmyewîyan emser bi giranî şuxilna, îstîxbarat şuxilna û pêro hêzê xo vistî dewre. Dişmen Herêmanê Pawitişî yê Medya de teng mend. La medyaya şerî ya dewlete no binkewtiş mîyan kerd. Metodê ma yê şerê tunelan metodêko winasên bi ke dişmenî qet nêpawitêne. Artêşa tirke vatêne qey a do bikewa herêman û cade nê cayan îşxal bikera. La medyaya şerî no zî mîyan kerd. 

Seba ke dişmen vera tunelanê şerî ser nêkewt dest pê şuxilnayîşê çekanê kîmyewîyan kerd. Ma tunelan de bedelê giranî dayî la qetî apey gamêke nêeşte. Dişmenî hende serran o hema zî karakterê xoverdayîşê PKKyî nêşinasnayo. PKK qet apey game nêerzeno. Coka dişmen rixmê şerê taybetî, gaz û çekanê kîmyewîyan zî ser nêkewt.

Dişmen ma ser o çinbîyayîşî ferz keno.Gerîlayan dewrê neweyî de xoverdayîşêko pîl mojna. Ame famkerdene le gerîlayî bi metodanê cîyayan, bi çalakîyan eşkeno dişmen vindarno. Dewlete şer de israr kena la eşkera yo ke pê şerî nêeşkena çîyêkî bivisna destî. Ma xo goreyê raştîyan amade kenê, ercnayîşanê xo û metodanê xo anê ca.

Gerîlayî do qetî dişmenî ra qesas bigêrê. Emser xoverdayîşê gerîlayan bi hêz û moralêko pîl. Îradeyo ke gerîlayan vera dişmenî mojna, bawerîyêka xurte, moral û motîvasyonêko xurt aferna. Seba wedarnayîşê tecrîdê vera Rayberîye, seba serkewtişanê pîlan ma do serra 2022î bikerê serra serkewtişî û têkoşînî. Serkewtiş ê gerîlayan o ke bi bawerîyêka pîle şer kenê!''