Avûkat Şerafettîn Kayayo ke nameyanê muhîman ê têgêrayîşê sîyasîyî yê kurdan ra yew o Almanya de dinyaya xo bedilnaye. Kaya vizêr memleketê ci Mûş de ame definkerdene.

Wekîlê HDPyî yê Mûşî Gulîstena Kiliç Koçyigit, Şevîne Coşkun, Wekîlê Bedlîsî Mahmut Celadet Gaydali, Rêxistina HDPyî ya Muşî, avûkatê baroyê Mûşî û merdimê keyeyî tewrê cenaza bîyî.

Kayayo ke Gimgimê Mûşî de ameyo dinya bado ke Mektebê Mamosteyîye yê Erziromî ra mezûn bi wextêk mamosteyîye kerde û dima ra 1962 de  Fatulteyê Huqûqî yê Anqara qedîna û dest pê avûkatîye kerd. Şerafettîn Kayayî xeylêk dosyayê sîyasîyî teqîp kerdî. Darbeya 12ê Êlule de ame destbendkerdene û raştê îşkenceyî ame.  Bi nameyê 'Amed de îşkence' kitabêk nuşt. Şerafettîn Kaya seba ke nêeşka cuya xo ya têkoşînî bido domnayene 90yan de vejîya teberê welatî û Almanya de ciwîya.