Awbendê Ilisûyî yo ke hetê dewleta Tirkî ra yeno awankerdene Hesenkeyfê kanî yê 12 hezar serrî rê gefan waneno. Rixmê razînêbîyayîşê xeylî doranê dinya zî talanê xoza û tarîxî dewam keno.

 Vervatoxê Komisyonê Kultur û Hunerî yê Organîzasyonê HDP’yî yê Stenbolî Mehmet Ûçarî, seba ke bale bianco serê babete kayêko bi nameyê ‘Hesenkeyf’ nuşt. 

 Kayo ke 80 deqeyî yo hetê Alî Yildirimî ra Salona Tîyatroyî ya Bariş Manço de ame pêşkêşkerdene. Kayî ra zî dîmenê panc deqeyî ameyî amadekerdene û medyaya sosyale de ameyî weşanayene.

 Ûçarî da zanayene ke asîmîlasyonkerdişê kulturê Kurdan agêrayo rijnayîşê tarîxî û vat, “Asîmîlasyon çinkerdişê kulturî de dereceyêk o, labelê meseleyo bingeyên modernîteya kapîtalîst a.” Ûçarî bêvengîya hemverê Hesenkeyfî krîtîk kerd.

 Ûçarî bale ante serê muhîmîya kulturkî ya Hesenkeyfî û vat, rixmo ke tarîxê 12 hezar serrî bi asanî yeno qalkerdene zî hetê kronolojîkî ra gama ke ma biercnê tarîxê ci şino heta Med û Persan. Ûçarî vat ke çîyêko bitehluke yo ke mîrasê tarîxî yê pîlî kenê qurbanê awbendêkê 50 serrî.

 Ûçarî derheqê tesîrê kayî de zî vat, “Bêguman do tesîr bikero, labelê tesîrêko ci yo topyekun do çinbo. Ma do bivînê ke hêzê êyo seba vurayîşê na yewe esto yan nê.”