Îdarekarê Merkezê Pêroyî yê Komeleya Huqûqnasan ê Seba Azadîye (OHD) Muhîttîn Muguçî derheqê tecrîdî de ANFyî rê qisey kerd û ard ziwan ke tecrîd rew ra kurdan rê yeno ferzkerdene.

Muguçî vat: ''Dima ke şarê kurdî pozîsyonê ronayox û kokê esasî yê komare ra ame vetene, nasnameyê tirkî ra ber nasnameyêko bîn nêame qebulkerdene, tecrîd kewt mîyanê cuya ma. Heman wextî de nasnameyê kurdan ame redkerdene, ziwanê kurdî ame qedexekerdene, nameyê cografya, dew û şaristanan ameyî vurnayene. Tecrîd bi awankerdişê zîndanê Îmraliyî şexsê Birêz Abdullah Ocalanî û tepişteyanê bînan de pêro tepişteyan rê ame ferzkerdene. Tepişteyî nêeşkenê keye û avûkatanê xo bivînê. Na mesele hînî asta huqûqî ra wetêr bîya meseleya komelkî.''

Muguçî pare kerd ke rêxistinê komelê sivîlî derheqê babeta tecrîdî de mîyanê nêzdîbîyayîşê pasîfî de yê û vat: ''Sebebê nê nêzdîbîyayîşê pasîfî no yo ke çalakîyê serê tecrîdî netîcegirewtişî ra dûrî yê. No zî mojneno ke rêxistinê komelê sivîlî komelbîyayîşî ra dûrî kewtê, hetê komelkî ra nêeşkenê xo rêxistin bikerê. Rêxistinê komelê sivîlkî û dezgehê bînî bi nê nêzdîbîyayîşê xo mîyanê çar dêsan de xo teng kenê. Ganî rêxistinê komelê sivîlî esasê ronîyayîşê xo ser o vera tecrîdî têbigêrê.''

Muguçî ard ziwan ke sey OHDyî ê rêxistinêka komelê sivîlî yê ke wazenê heqê bingeyî û azadîye her şert û mercî de bêrê pawitene û vat: ''OHD wayîrê ê heqî yo ke her babete ser o qisey bikero. Babeta tecrîdî de zî wezîfeyê ma yo ke karêko bites pratîze bikerê.''