Temellî: Peynîya nê rayîrî azadî û aşitî ya!

Hemserekê HDP’yî yo pêroyî Sezaî Temellîyî mîtîngê HDP’yî yê Amedî de qisey kerd, da zanayene ke hemverê şerî de mucadeleyê aşitîye kenê û vat, “Senî ma Amed û Qers de bîyî îqtîdar ma do Tirkîya de zî bibê îqtîdar. Peynîya nê rayîrî azadî û aşitî ya.” 

Mîtîngê Partîya Şaran a Demokratîke (HDP) yê bi slogana ‘Seba aşitîyêka bianore çareserîya demokratîke’ ke vizêr Meydanê 5’ê Hezîrane de ame viraştene. Mîtîngo ke bi hezaran kesî tewrê ci bîyî, slogana ‘Hemverê şerî de aşitî’ zimî daye. Mîtîng de ciwan û mayê ke tewrê ci bîbî hemverê hemkarîya PDK’yî ya bi rejîmê Tirkîya razînêbîyayîşê xo ard ziwan.

 ‘Efrîn ê Efrînijan o’

Hemserekê Partîya Şaran a Demokratîke (HDP) yo pêroyî Sezaî Temellîyî bi vatişê ‘Êyê ke wazenê nê rayîrî ra agêrê wa agêrê, ma nêgêrenê a’ dest bi qiseykerdişî kerd û wina domna:

“Nê dimayê çinkerdiş û raşayîşê tarîx û kulturî yê. Ma zî tarîx û kulturê xo rê wayîr vejîyê. Ma do pîya biciwîyê, ma do pîya komarêka demokratîke awan bikerê. Rixmê her çîyî de ma do kîşta yewbînan de ca bigêrê û demokrasî û aşitîye awan bikerê. Umîd ma yê, na yewe ra hêrişê HDP’yî kenê. Ê dişmenê kultur, tarîx, karker, Kurd, Tirk, to û min ê. Ê Erdoganî dir ameyî, do Erdoganî dir şirê. Ê teberê şerî de çîyêk nêzanê. Tim operasyonanê teberê sînorî virazenê. Dima ra zî yenê serê nameyê çareserîye de qisey kenê. Eke şima aşitîye wazenê a game hurmet ramojnê şaranê Sûrîye. A game vajê; seba Tirkîya aşitî û seba Rojakewtena Mîyanêne aşitî. A game do aşitî mumkun bo. Efrîn do bibo yê Efrînijan.”

 ‘Ma Aşitîyêke Demokratîke Pêşnîyar Kenê’

Temellîyî persa ‚teberê şer û dişmenîye de şima do çi bidê nê şarî‘ kerde û vat: „Ma Qibris de aşitîyêka demokratîke wazenê. Ma wazenê peynîya polîtîkayanê şerî yê Qibrisî, Sûrîye û Tirkîya bêrê. Ma karê xo wazenê. Nanê xo wazenê, aşitîye wazenê. No şer feqîrî û zulm o. Dem demê peynîciardişê polîtîkayanê şerî yo. No şer çewî rê faydeyêk nêdano tena ‚Zama’yî rê bifayde yo. Şar feqîr o, karker feqîr o. Daristanê ma yenê vêşnayene, Hesenkeyf de tarîxê des hezaran serran yeno raşanayene. Tena seba ke ê bibê dewlemend wina kenê. Ma do peynîya nê bîyarê.

‘Peynîya Nê Rayîrî Aşitî ya’

Temellîyî vat: “Seba ke no welat hişmendîya faşîzane ra bixelesîyo, seba ke no welat şer, feqîrî û xirabîye ra bixelesîyo HDP aver şino. Ma do pîya ameyoxê xo awan bikerê. Ma do bêrê têhet û Qanûnêkê Bingeyênî virazê. Seba ke Sebahate azad bibo, Selahattîn, Gulten, Îdrîs azad bibê ma do xover bidê. Ma do xover bidê û bi ser bikewê. Bawer bikerê ma do qetîyen bi ser bikewê. Senî ma Amed û Qers de bîyî îqtîdar ma do Tirkîya de zî bibê îqtîdar. Peynîya nê rayîrî azadî û aşitî ya.“