Ame pêhesîyayene ke dimayê qewimîyayîşê kişîyayîşê endamê konsolosxaneyê Tirkî yê Hewlêrî, hêzanê asayîşî Duhok û Hewlêr de eşto serê keyeyanê xeylî hemwelajianê ke Vakurê Kurdistanî ra yê. Qezaya Zaxo de zî, ke hemwelatijê Vakurê Kurdistanî rîyê sebebanê cîyayan ra mecbûr mendê bêrê, înan ra ameyo waştene ke herême ra vejîyê.

 Goreyê zanayîşanê ke çimeyanê Zaxo, Duhok û Hewlerî dayî, dimayê qewimîyayîşê Hewlêrî, hêzanê asayîşî eşto sere xeylî keyeyanê Vakurê Kurdistanijan. Çimeyan vat ke asayîşî heta nika veng dayo 25 kesan ke herême ra vejîyê. Bajarekê Şeladizê yê qezaya Amedîye ya Duhokî de keso bi nameyê Lezgîn Oremarîyo ke kampa Mexmûrî ra yo, la no çend dem o ameyo Şeladizê, zewecîyayo û domanê ci zî estê, keyeyê ê bajarekî ra ameyo vetene. La nêno zanayene ke Lezgînî keyeyê xo berdo kamca.

 Çimeyanê Duhok û Hewlêrî pêhesna ke asayîşî eşto serê xeylî keyeyanê Vakurê Kurdistanijan û derheqê înan de hayîdarîyî arê dayê û nasnameyê înan kontrol kerdê. Bi heman hawayî Silêmanîye de zî asayîşî veng da karkeranê Kampa Mexmûrî yê ke kargehan de xebetênê û hayîdarîyê înan girewtê. Hetêna ra tayênan ra zî ameyo waştene ke şirê asayîş de îmzaya xo bide. Ame vatene ke merdimê Mexmûrijî Silêmanîye de ameyê tepiştene, la na hayîdarî nêamî teyîdkerdene û sebebê tepiştişî nêame zanayene.