Gulana 2021î de dewa Şêxanî ya qezaya Payîzava ya Wanî de dewijan vera viraştişê ocaxê mermerî xo ver da la leşkeran guleyî eştî dewijan ser. Serebût de tay dewijî birîndar bîyî û 12 dewijî zî ameyî destbendkerdene.

Waro ke waştêne tede ocaxê mermerî bêro viraştene teslîmê xazîna ame kerdene û axûrê dewijan ameyî xirakerdene. Dewijan vera ney nêrazîbîyayîşê xo mojna. Hêrişê leşkeran ra dima axûrî ameyî rijnayene. Dewijê destbendkerdeyî ameyî veradayene.

Qeymeqamîya Payîzava zî bi eşkerayîyêke îdîa kerd ke dewijî nê leşkerî pê kerrayan birîndar bîyê. Dewijan û leşkeran gerreyê yewbînan kerd. Dozgerîya Komare ya Payîzava goş nêda gerreyê dewijan la seba leşkeran dest pê tehqîqatî kerd.

Çawişê pisporî yê cendirmeyan ê Guzelsuyî Rahmî Azatliyî gerre kerd û naye ser o Serdozgerîya Komare ya Payîzava gerrenameyêk amade kerd. Gerrename de ame îdîakerdene ke dewijan ra Hadî Yucelî dayo çawuşî ro.

Derheqê babete de Hadî Yucelî îfadeyê xo da. Dozgerê Payîzava îdîa kerd ke ''derheqê sûcê Yucelî'' de delîlê qîmî estê û waşt ke Yucel bêro cezakerdene.

Dozgerîye gerrename Mehkeme Cezaya Aslîye ya Payîzava rê erşawit.