Vervatoxanê Grûba Meclîsê HDPyî ya Meclîsê Şaredarîya Çewlîgî budçeya 2022î bi tûjî rexne kerde û vat: ''Nufusê şaristanî 150 hezar o la qasê 30 mîlyon TL budçe dîyaye şaristanî. No mîqtar qîm nêkeno.''
Meclîsê Şaredarîya Çewlîgî de pêvînayîşê budçe qedîyayî. Vervatoxanê Grûba Meclîsê HDPyî ya Meclîsê Şaredarîya Çewlîgî Ferhat Yildirim û Hatîce Kitay derheqê pêvînayîşan de eşkerayîyêke daye.
Ferhat Yildirimî û Hatîce Kitay eşkerayîya xo de da zanayene ke pêvînayîşan de seba şaristanî 240 mîlyon TL ame waştene la na budçe rê zî semedê xizmetê şarî têna 30 mîlyon TL do bimano.
Ferhat Yildirimî û Hatîce Kitay vat: ''Ma vînenê ke no 30 mîlyon TL zî do terefgîranê îqtîdarî rê bêro pêşkêşkerdene. Na budçe wendekar, cinî û kedkaran rê neheqî ya. Na budçeya ke pê bacanê şarî yarê dîyena têna sermayedaranê Şaredarîya Çewlîgî ya AKPyî rê xizmet kena. Mumkîn nîyo ke ma na budçe tesdîq bikerê.''
