Dewa Westanî ya Wanî de bi fermanê walîtîye dewijan rê îşkence amebi kerdene. Gerreyanê dewijan ra dima Walîtîya Wanî Mehkemeya Qanûnê Bingeyî de pawitişê xo kerd. Walîtîye  îdîa kerd ke çîyo ke ameyo kerdene goreyê qanûnan o û vat: ''Seba ke rayêk bîyo û pê tedawîya şenike çareser bîyo no têgêrayîş gefêk yan zî îşkence nîyo.''

Têkoşînê huqûqî yê çar dewijan dewam keno. Walîtîya Wanî çar dewijî Cemal Aslan, Halîl Aslan, Necdet Beysûm û Abdulselam Aslan 'sûcdar' îlan kerdbî.

Walîtîye pawitişê xo de îdîa kerd ke çar dewijî goreyê qanûnan ameyê destbendkerdene û seba ke îşkenceyî ser o 'delîl' çin o înan derheqê tehqîqatê polîsan Hakan Erîlgîn, Kerem Sonmez, Muhammed Cîhan Oksuz, Murat Şener, Ozcan Eslen û Ozkan Zamûrî de bira teqîbnêkerdişî daye.