Dimayo ke rejîmê Enqereyî peynîya prosesê ‘pêvînayîş’ yan zî ‚çareserîye‘ arde û dest bi şerî kerd xozaya Kurdistanî bi hawayêkê sîstematîkî yena talankerdene û vêşnayene.

Bi taybetî herêmê ke operasyon tede yenê kerdene û dormeyê qereqolanê leşkerîyan de daristanî yenê vêşnayene. Tena darî nê heman wextî de bi hezaran ganeyî zî rîyê şewatî ra raste ra wedarênê. Dewleta Tirkî seba tefnayîşê şewatî çîyêk kena ne zî verdana ke şar bitefno. Parlamentera HDP’yî ya Şirnexî Nûran Îmîre vat ke serra 2017 de Tirkîya de wareyê daristanî ra 119 hezar û 92 hektarî vêşayo.

Îmîre vat, „Ma zanê ke şewatê herêma ma hetê kamî ra û seba çiyî yenê vetene.“ Îmîre bale ante ser ke şewatî hetê hêzanê asayîşî ra bi îdîaya ‚asayîşî‘ yenê vetene û vat, „Reyan bi topêk ke qereqolêk ra yeno eştene, reyan zî dimayê operasyonî ra bi vêşnayîşê wareyî û reyan zî bi hêrişanê teyareyanê şerî daristanî yenê vêşnayene.“

Îmîre ard ziwan ke şewatî çarçewaya planê ‚binfînayîşî‘ de vejênê û vat, „Yeno waştene ke zergûnayîya ke herême de esta raste ra bêro wedartene û bikerê sey çolî. Şewat hem cuya merdiman rê gefêk o û hem zî beno sebeb ke merdimî cayê xo ra bar bikerê. Heman wextî de seba ganeyanê ke daristanan de ciwîyenê zî şewat gefêk o. Cayêkê bînî yê dinya de yan zî bajarêkê rojawanê Tirkîya de gama ke şewat virazêno hem hewa ta hem zî bejikî ra cehd yeno kerdene ke bêro tefnayene. Ajansî heme bi sernameyê ‚cîgera ma vêşaye‘ xeberan danê. Labelê gama ke herême de şewat virazêno seba tefnayîşê ci çew çîyêk nêkeno. Kesê ke wazenê adirî bitefnê zî sey sûcdar yenê îlankerdene.“

 Îmîre ard ziwan ke şewatê ke bi zanayîşî yenê vetene xeta îdeolojîke ya dewlete ramojnenê û vat her wareyî de faşîzm serdest o. Îmîre vat, „Nê prosesî de ke dereceya tewr berze de heqê merdiman yenê binpaykerdene, dewlete rîyê xo yê zordarî bi hemverîya xo ya xoza ramojnena. Ma do zî na hêrişkarîya dewlete her ca de teşhîr bikerê.”