Qezaya Qisle ya Dêrsimî de Serekê Cemxaneyê Duzgun Babayî Sînan Kirmiziçîçekî  perey bi eşkerayîya nuştekîye dabi eşnawitene ke hîrê serranê peyênan de Cemxaneyê înan rê bîllasebeb 60 hezar cezaya pereyî ameya birnayene û nê sey bêhuqûqîye name kerdbi. Bado ke çapemenîye de xebere vila bîye Qaymeqamê Qisle Ugur Tutkan pîya bi hêzanê leşkerî şi Cemxane, fotografê ke destê înan de tifingî estê medyaya sanale de pare kerd û Kirmiziçîçek tehdît kerd.

Tutkanî îdîaka kerd ke binê nameyê komele de pere yeno arêdayene û teberê Cemxaneyî de yeno xerckerdene û vat: ''Komara Tirkîya dewleta qanûn û huqûqî ya. Ma do huqûq û hêzê dewletê bimejnê to û êyê ke sey to yê.''

Wekîlê HDPyî yê Dêrsimî Alîcan Onluyî bi eşkerayîyêke vera qeymeqamî nêrazîbîyayîşê xo mojna û îfade kerd ke tewirê qeymeqamî mojneno ke o vergê qesre yo. Onluyî vat: ''Êyê ke wayîrê edeb, rayîr û erkanî yê eşkenê merkezanê ma yê bawerîye pers bikerê. Ti pê zirxê qesre nêeşkenê qala hedî bikerî. Êyê ke hedê xo nêzanenê nêeşkenê qala heqî bikerê.''

Wekîlê HDPyî yê Îstanbulî Alî Kenanogluyî zî hesabê xo yê twitterî de vera qeymeqamê Qisle nêrazîbîyayîşê xo mojna û vat: ''Qeymeqamo bêhed bi zelalî îdareyê cemxaneyî rê gefan waneno. Wina yew selahîyetê to çin o. Hedê xo bizane!''