Şarê êzidîyan azadkerdişê Şingalî ra dima bingeyê Xoserîya Demokratîke ya Şingalî de 2016 de Asayîşê Êzidxanî awan kerd. La îtîfaqê PDK, dewleta tirke û AKP-MHPyî seba ke hêzanê asayîşî çin bikerê Peymana Şingalî ya 9ê Teşrîna Verêne amade kerde. 18ê nîsane de zî artêşa Iraqê hêrişê noqtayanê Asayîşê Êzixanî kerd.

Mesuldarê Asayîşê Êzidxanî yê qezaya Sinûnê Nasir Xeyroyî derheqê babete de ANFyî rê qisey kerd.

Xeyroyî dîyar kerd ke fermanî ra dima şarî waştene ke asayî bibı û bi nê hawayî hêzê pawitişî yê Asayîşê Êzidxanî ronîyayî. Xeyroyî vat: ''Asayîşê Êzidxanî ronîyayîşê xo ra nata seba asayîşê şarî xebitîyeno. O çax Şingal de ne PDK ne zî artêşa Iraqî est bîye. Fermanî ra dima şarê Şingalî dî ke pê hêzanê înan ganî bawer mekero. Şar ma rê, ma zî şarî rê paştî danê. Asayîşê Êzidxanî pê îradeyê şarî ronîyayo coka çew nêeşkeno îradeyê şarî înkar bikero. Ma zî pê xoverdayîşî wayîrê îradeyê şarî vejîyenê. Şar Asayîşê Êzidxanî de meseleyanê xo zî çareser keno. Pêro dewan de yewinê ma est ê.

Her kes zaneno ke Peymana 9ê Teşrîna verêne seba ke aramîya şarî bixeripna îmza bîya. Bê pawitişê xo şar nêeşkeno asayî bo. Nika ma rê yeno ferzkerdene ke ma hêzanê xo vila bikerê û şarî bêpawitiş war verdê.Verî înan ma nêpawitbî. Nika vanê 'ma do bipawê.' La hînî şarê ma pê vatişê înan bawer nêkeno.''

Xeyroyî bale ante hêrişê 18ê nîsane ser û vat: ''Nê hêrişî Peymana 9ê Teşrîna Verêne ra dima qewimîyayî. Şarî bi tewirê xo cewab da nê hêrişî. Iraq de qet yew hêzo sîyasî temamîya Iraqî nêfikireno. ê bi nê hawayî nêzdîyê Şingalî zî benê. La no nêzdîbîyayîş Iraqî rê fayde nêkero. Ma domanê nê şarî yê. Ma soz da şarê xo ke înan bipawê. Ma do sozê xo bîyarê ca.'2