Operasyonê îşxalî yê hemverê Xakurkê ke hîrêgoşeyê Başûr, Vakur û Rojakewtena Kurdistanî de yo, xoza rastê hêrişanê sîstematîkan yena.

 Artêşa Tirkî bi teyareyanê F-16 yê Amerîka, helîkopteranê tîpê kobrayan, hewan û obusan, xusûsen zî Şêxzade û Newala Lolanî, qintarê Koyê Şekîfî, dormeyê Qilê Lelîkanî û xeylî wareyanê bînan bêmabên bombardûman kena.

 Tewirê nebatanê cayîyan ê ke herêma Xakurkê de vêşayê û heywanê kovîyî yê ke perçe bîyê dîmenê bidejan anê pê. Darî, çimeyê awan, nebatî, marî û xeylî tewirê ganeyanê bînan benê qurbanê îşxalî.

 Gerîlayan ra yew, marêkê perçebîyayeyî yo ke şerê dewleta Tirkî yê hemverê cuya xozayîye de akerdo ramojneno. Rojhat Torîyo Kerboranij vano ke coxrafyaya Kurdistanî ya ke ê bi ganê xo pawenê hetê hêzanê îşxalkaran ê Tirkan ra bêmabên yena bombardûmankerdene.

 Torî vano, “Artêşa Tirkî ya îşxalkare derheqê Kurd û Kurdîtîye de çi esto bi hawayêkê barbarî hêrişê ci kena. Bi se serran o coxrafyaya Kurdistanî rastê talan û tehrîbatêkê pîlî yena. Xeylî tewirê ganeyan ê ke xozaya ma de bî ameyê şêmûga vînîbîyayîşî.”

 Torî vano ke bi seyan tewirê ganeyan vînîbîyayîşî dir ameyê têrî û vano, “Ma do sey gerîlayê azadîye heta peynî erdanê xo, awa xo û xozaya xo bipawê.”

Torî nê vatişan îlawe keno: “Xora ma nika xoverdayîşê tewr pîlî yê tarîxî rê şahidîye kenê. Dimayê Efrînî ra hêzê Tirkan wazenê ke Başûrê Kurdistanî îşxal bikerê. Gama nê kenê zî bi hawayêkê barbarî xoza qetil kenê. Gama ke nêeşkenê hemverê gerîlayan de biresê netîce bi hemeyê hêrsê xo hêrişê xoza, nebatan kenê, heywanan kişenê, mergan tehrîb kenê û kenê ke herême bêmerdim verdê.”