‘Xakurkê de tarîx yeno nûştene’

Endama Komîteya Rayberdişî ya PKK’yî Xalîse Engîzeke derheqê xoverdayîşê gerîlayan ê hemverê hêrişanê îşxalkarîya dewleta Tirkî ke hemverê Başûrê Kurdistanî de kena qisey kerd û vat, “Xakurkê de tarîx yeno nûştene.”

Endama Komîteya Rayberdişî ya PKK’yî Xalîse Engîzeke derheqê xoverdayîşê tarîxîyî yê hemverê îşxalkarîya dewleta Tirkî ya serê erdê Başûrê Kurdistanî qisey kerd. Qiseykerdişê endama Komîteya Rayberdişî ya PKK’yî Xalîse Engîzeke wina yo: 

“Xakurkê de tarîx yeno nuştene, tarîxê çiyî yeno nuştene, tarîxê coxrafyaya îlaheya ke textî ser o ronişte ya û bi hezaran serran o, binê pencikê îşxalkaran de nalena. Amîya eceqnayene, perçekerdene, talankerdene, dewê aye ameyê vêşnayene, cimatê aye ameyo koçberkerdene û rastîya aye ya cimatkîye amîya vilakerdene. Rastîya xo ra amîya dûrîfînayene û kenê ke bikerê Enkîdû û Beko yê demî. Cinîyê aye binê fehmê namûsî de zereyê keyeyî de, binê şalan de ameyê nimitene û bêvengkerdene. Nê destanî rew ra verê 40 serran dest pêkerdo. Grûbanê şorişgêran ê ke sey Apocî ameyêne namekerdene û fermandar Egîdî yo ke planê hemleya 15’ê Tebaxe ûca neqeşna ra ta Gulnaz Karataş-Berîtanan û ûca ra zî ta Rustem Cûdî, Çîçeke û Alîşêran, înan ra ta Agirî û Hawaran û înan ra zî ta Kendal û Mizgînan. E, rasta ci no destan hewna zî yeno nuştene, rîpelê ke hetê hemra Welat û Besê ra nusîyayê rîpelanê tarîxê azadîya welatî, neteweyî û cuya ke sey tîranê rojî mîyanê rehanê wucûdê ma de yê, zerrîya ma germ kerde û ma gamêna nizdê azadîye kerdî.

Welat û Besê Nameyê Qehremanîya Demî yê

Bêguman rayapêroyîye ya dinya, merdimîye, sazîyê heqanê merdiman ê ke qaşo sazîyê heqanê merdiman ê, xo bêveng kerdê. Senî şerwananê azadîye Kobanê de bi cane xo yê viranî hemverê zulmê DAÎŞ’î de, ke organîzasyono tewr barbar ê tarîxê merdimîye bi, bi ruhê fedaîyî yê Arîn û Rêvanan no plan pûç kerd û destan nuşt û bala dinya ante xo ser, no bi desan serran o ke gerîlayê Kurdistanî destanan nuseno û dinya bêveng a, la no nêno na mana ke xoverdayîş çino. Dinya de çi nuştox, şaîr, roşinvîr û edebîyatkarî estê wa bêrê xoverdayîşê laj û keynayanê îleheyan Xakurkê de bivînê û belkî seba ke qelema înan pake bo binusê, çunke gerîlayî bi gonîya xo tarîxî nusenê. E, destanê hemra Welat û Besê ê destanan ra yew o. Teyareyê şerî dîmenanê embazan vînenê, dima ra heme hêzê ûcayî keweno dewre û bi wesayîtanê zirxinan dorê embazan gênê. Amacê înan o yo ke heme embazan îmha bikerê. Labelê grûbe mîyanê xo de munaqeşe kena, embaz Welat û embaze Besê bi hawayêkê fedaîyî şinê serê dişmenî û şer kenê. Na çalakîye de 2 efser û 2 çawişê ekspertî yenê kiştene, 3 leşkerê înan zî birîndar benê. Embazî bi ruhê fedaîyî şer kenê û her di embazî bi qehremanî tewrê karwanê şehîdan benê. Embazê bînî zî xelesênê. E, no ruhê Egîd û Berîtanan o. No ruhê şerwanî û cesaretê neweyî yê Apocî yo. 

Keyna û Lajê Kurdî Seba Cuyêka Newî Mucadele Kenê

No tewirê Kurdê neweyî, cinîya Kurda newî, camêrdê Kurdê neweyî yo. No nasnameyê Kurdîtîya neweyî ya, Kurdîtîya azade ya. Bi rastî nê her di embazanê ciwanan ê xasekan bi dilopa gonîya xo rîpelêk tarîxê azadîye rê zêde kerd. Her di embazî zaf ciwan ê, la belê zerrîya înan polayên o û zaf pîl ê. Na yewe ra ganî nê cesûrî û cinîyê cesûrî mucadele tena nêrê verdayne. Ganî ma bikerê ke Welat û Besêyan bide ciwînayene, ma beyraqa azadîye serê erdanê xo de berz kerê û welatê azadî ruhê înan rê bikerê xelate.”