Endamê Konseya Rayberdişî ya KCKyî Xebat Andokî derheqê Komployê 15ê Sibate yê vera Rayberê Şarê Kurdî Abdullah Ocalanî de Radyoyê Dengê Welatî rê qisey kerd.

Andokî komplo şermezar kerd û vat: ''Vera komployî xoverdayîşo xurt ame kerdene.  Bi desan embazê ma bi slogana 'Şima nêeşkenê tîja ma tarî bikerê' bedenê xo dayî adirî ver û şehîd bîyî. Gerîlayanê azadîye yê Kurdîstanî xo mîyanê dişmenî teqna. Şarê kurdî welat û teberê welatî de bi seferber. Vera komployî têkoşîn û xoverdayîş ame reyraberdene. Netîceya nê têkoşînî de bi desan embaz û welatperwerê ma şehîd bîyî. Ez heme şehîdanê ma bi hurmet yad kena.

Taktîkê dişêmenî, taktîkê komployî yê. Nê taktîkî xap, kay û xîle yê.  Belgehê ke vejîyayî meydan ramojnenê ke nizdê 30 dewletan mîyanê komployê mîyanneteweyî de ca genê. Êyê ke sey dostî têgerayêne peyra eşkera bi ke dost nîyê, xayîn û zûrker ê. Zaf xayînî estê ke binê nameyê kurdîtîye de falîyet reyra benê la serê sibayî ra heta şanî dişmenî reyde hemkarîye kenê.

1998 de gama ke pêkerdişê Washingtonî ame îmzakerdene yew hetê ci Qesra Sipî bi hetê ci yo bîn zî sîyasetê Başurê Kurdîstanî bi. Tay partîyanê kurdan nê koployî de cayê xo girewt. Vera Rayberîye, têgerayîş û şarê ma komplo ame kerdene. No komplo têna hetê dewleta tirke ra nêbi. Hende hêzê dewleta tirke çînêbi. Serekwezîrê dewrî Bulent Ecevîtî vat 'Amerîka qey Abdullah Ocalan da ma ez nêzana.' Komplo bi destê hêzanê modernîteya kapîtalîste bi.  Înanê ke meseleya kurdî kerda sey gireyî hêzê kapîtalîst ê.

Dewleta tirke semedê qirkerdişê kurdan çiyo ke destê ci ra ame kerd. Qirkerdişê Zîlane, Serewedaritişê Şêx Seîdî, Dêrsim na çarçewe de bîyî  qirkerdişo fîzîkî û kulturkî heta wextê têgêrayîşê ma dewam kerd. Têgêrayîşê Azadîye planê modernîteya kapîtalîste pûç vetî. Înan hesabê têgêrayîşê winayênî nêkerdbi. Plananê dewleta tirke zî nêtepişt. Înan waşt PKKyî û Rayberîye bikerê mîyanê sîstemê xo pede pede bihelnê. Rayberîye no qebul nêkerd.

Hêzanê modernîteya kapîtalîste 90yan de waşt Rojhilatê Mîyanênî goreyê xo dîzayn bikerê û êyê ke vera ci vejîyenê waşt werte ra wedarê. Badê rijnayîşê Yewîya Sovyetan Rayberîye bi PKKyî sosyalîzmî temsîl kerd. Beyraqa sosyalîzmî dahîna cor de têşîyayene. Rayberîya gerîlayan de ame kerdene. Na rewşe heme dinya de  tesîr kerd. Hêzanê modernîteya kapîtalîste no xo rê sey problemî dî. Coka hema ke dest nêeşto Rojhilatê Mîyanenî qerar girewt ke Rayberîye meydan ra wedarê.  Rayberîye vano rolê Tirkîya sîstemê Îmraliyî de têna gardîyanîye yo. Rayber Apo eşt yew zîndanî ke qanûn qerarê ci destê modernîteya kapîtalîste de yê.

Vejîyayîşê Rayberîye bi vejîyayîşê partîye. Nê Rojhilatê Mîyanênî de zaf hesabî xeripnayî. Rayberîye her ca de bi hêvîya mazlûman. Potansîyelê ci bi ke Rojhilatê Mîyanênî û Kurdîstan de vera sîstemê modernîteya kapîtalîste sîstemanê cîyayan biaferno. Badê komployî Rojhilatê Mîyanênî rê mudaxale ame kerdene. Erdogan 20 serrî yo îqtîdar de yo.  No zî pabesteyê komployî yo.  Di rolî dîyayî Erdoganî. Averberdişê îslamê nermî û  çînkerdişê PKK û kurdanê azadwaştoxan.  Rewşa peyêne de eseno ke Erdogan wird rolan de zî bin kewt. Ne eşke kurdan biqedîno ne zî îslamo sîyasal aver berd.

Destpêkerdişê komployî de hedefê pîlî yê komlokaran bibî. Înan hesab kerd ke bi tesfîyekerdişê Rayberîye PKK qedîyeno. Vatêne qey sey serewedaritişanê verênan reyna nê zî bin fînenî û şarê kurdî teslîm genê. Komplo ser nêkewt. Rayberîyê kayê înan serûbin kerdî û bi hêzo îdeolojîko tewr pîl ê dinya. PKKyî Rayberîye xo rê esas girewt, yewîya xo pawite, têkoşîn kerd û xo xurtêr kerd. PKK çar leteyanê Kurdîstanî de partîya tewr pîl a. PKK têna têgêrayîşê kurdan nê têgêrayîşê şar o. Seba ke PKK û Rayberîye bin nêkewtî şar zî rayîrê serkêşanê xo ra şi. Komelê kurdan nika komelanê bînan rê nimûne ya.

Komplo ame pûçvetene la tehluke hema nêqedîyayo. Hêrişî dewam kenê. Rayber Apoyî ra xebere çîn a. Têna ma zanê ke o xover dano. Komplo bi hemkarîya Tirkîya, Amerîka û PDKyî yeno domnayene. Komployo ke Şam de ame destpêkerdene wazenê Başûrê Kurdîstanî de temam bikerê. Semedê azadîya fîzîkîye ya Rayber Apoyî ganî têkoşîn bêro xurtkerdene, çalakîyê pîlî bêrê kerdene. Vera komployî ganî ma qîyamet biqerfinê. Eke yew ca de îqtîdar, dewleta tirke esta ûca haştîye çîn a, faşîzm û qirkerdiş esto. Rayberîye vera modernîteya kapîtalîste û komployî bi sembolê têkoşînî.  Ma zî ganî têkoşînî xurtêr bikerê ke sîstemê qikerdişî ra bixelisîyê. Na çarçewe de sere de cinî û ciwanî ma veng danê her kesî ke wa têkoşînî pîlêr bikerê.''