Dewleta tirke bi mengan o bêmabên Warê Xoverdayîşî yê  Werxelê bombarduman kena ke îşxal bikero.  Gazê kîmyewîyî zî tede heme metodê leyminî yenê şuxulnanyene. Vera nê hêrişanê îşxalî Xoverdayoxê Werxelê têkoşîno xurt dane û destûrê îşxalî nêdanê.

Gerîlayê ke Warê Xoverdayîşê yê Werxelê de yê 10ê êlule de bêtelî ra veng da heme şarê Kurdîstanî, merdimîya demokratîke û hemrayana xo.

Mesaj wina yo:

''Xeylêk embazê ma yê ke bi qerardarîya pîle tewrê operasyonê Avaşînî bîyî, cuya xo sey bedelî daye û tewrê kerwanê şehîdan bîyî. Ercê ke nê embazanê ma afernayî do rayîrê merdimîye roşn bikerê. Şexsê nê hemrayanê ma de ma heme şahîdanê xo yad kenê. Ma do tim wayîrê şehîdanê xo vejîyê.

Metodanê leminan şuxulnenê

Ma sere de Rayber Apoyo ke vera hêrişê dişmenî xover dano heme hemra û şarê xo rê selam û heskerdişê xo şawenê. Hêrişê dewleta tirke yê vera Kurdîstanî nêqedîyayî, do nêqedîyê û tim dewam bikerê. Nê hêrişî ramojnenê ke peynîya înan nêzdî bîya. Seba ke ê na raştîye zanê qet qeydeyêkî nas nêkenî, pê heme metodananê leyminan hêriş kenê.

Ma beyraqa xoverdayîşî naya xo doşe

Ma wezîfeyê têşayîşê beyraqa kulturê xoverdayîşê Apoyî yo ke Zîndanê Amedî de dişmenî verê ci de çok da, nayo  xo doşe. Heta ke xeta xoverdayîşî ya Mazlûm Dogan, Kemal Pîr, Hayrî Durmuş, Alî Çîçek û Akîf Yilmazan dewam bikero, dişmen her hêrişkerdişê xo de do zafêr binbikewo.

Paştîya ma ma ra pêt a

Dewleta tirke zîndan de her tewir îşkence kerd la xoverdayîş nêqedîya, pîlêr bi. Çar parçeyanê Kurdîstanî ra vila bi. Xoverdayîşo ke Kemal û Hayrîyan ra heta Serhat û Şerzanan bi derg, têna dewleta tirke ya îşxalkere nê do peynîya xeta xîyanetî ya hemkare zî bîyaro. Na babete de heta peynî paştîya ma ma ra pêt a.

90 rojî yo gaz yeno şuxulnayene

Dişmen tim gazan şuxulneno û teqnayîşan keno. 4 mengî yo ke no operasyon dewam keno û 90 rojî yo gaz şuxulnenê û teqnayîşan kenê. Zafê nê gazan çeka kîmyewîye ya. Nê gazî xoza zî çîn kenê. 90 rojî yo nê gazî bêmabên yenê şuxulnayene. La zinarê heybetin ê Zagrosan xover danê û do xoverdayîşî rê dewam bikerê.  Dişmenî waşt dewbikewo tunalanê şerî la embazanê ma destûrê ci nêda û ê mecbur mendê ke pêyser agêrê. Naye ser o pê teyarayanê şerî û teyarayanê bêmerdiman hêriş kerd. Artêşa tirke ya ke merdimîye ra nasîbê xo nêgirewto heme metodan şuxulnena.

Şeref û rumetê înan nêmendo

Leşkerîye wezîfeyêko birumet û bişeref o. Dewleta tirke şeref û rumet binpay kerdî. Ma tarîxî ra zî zanê ke; qeyde û peymitişê şerî estê.  Her leşker ''şeref û rumetê' xo ser o sond waneno. Dewleta tirke û koleyanê ci de şeref û rumet nêmendî. Eke merdimîye ra biney nasîbê xo bigirewtêne wina nêkerdêne. Kelaya Werxelê rixmê heme hêrişan 90 rojî yo xover dana do xoverdayîşê xo bidomno. Pê nê hêrişan wehşîyan ê do çîyêk dest nêfînê. Nê hêrişan ra do înan rê têna raştîya risîyayîye bimano.

Ma do ercanê merdimîye bipawê

Nika kenê ke binkewtişê xo biniminê. Ma zî serkewtişê xeta xoverdayîşî ya kurdan reyna pelanê tarîxî de nusenê. Dewleta tirke hêrişê heme ercanê ma kena. Çîyê ke tarîxê merdimîye de nameyî vînayene vera şarê ma kenê. Hetêkî ra hêrişê kurdan kenê hetê bînî ra qala wayûbiratîya kurdan kenê. No zî dirîyîya înan ramojneno. Her çiqas xeta xîyanetî zî bibo Kurdîstan vera kolonyalîstan tim kelaya xoverdayîşî ya. Kulturê Apoyî nê herran de tim rindîye û raştîye ramitê. Ma zî sey pawitixê heme ercanê merdimîye do çirey kerdişanê dewleta tirke xo vîr a nêkerê.

Hêrişî ma xurtêr kenê

No xoverdayîş hersê hezar serran ano vîrê ma. Ma do nê hersî çar parçeyanê Kurdîstanî ra vila bikerê. Ganî serê herra Kurdîstanî de her kes na raştîye bizano. Nefesgirewtişê ma zî sîstemê înan xeripneno. Ma her hêrişî de sey kardî benê tuj. Hêrişê ke vera Rayber Apoyî yo ke ercê ma yo tewr pîlo, bîyî ma çirey xo vîr a nêkerê. Wa dewleta tirke û hemkarê ci bizanê ke ma do kerdişanê înan xo vîr a nêkerê, no xoverdayîş do açarîyo hemleya qesas û hêrişî.''

Mesajê Xoverdayoxanê Werxelê bi slogananê ''Biciwîyo Rayber Apo'', ''Biciwîyo xoverdayîşê vera kolonyalîstan'' û ''Biciwîyo Xoverdayîşê Kelaya Werxelê'' qedîya.