Hemsereka Konseya Rayberdişî ya KCKyî Besê Xozat Medya Haber TV de tecrîdê Îmraliyî, operasyonê leşkerî, destsernayîşê şaredarîyanê kurdan û xoverdayîşê gerîlayan ercnayî. 

Qiseykerdişê Besê Xozat ra tay noqtayê girîngî wina yê:

''Hemleya Azadîye ya 10ê Teşrîna Verêne resaye astêka girînge û roje bi roje bena globale. Seba azadîya Rayberîye wayîrvejîyayîş û têkoşînêko xurt yeno kerdene. Têkoşînê seba azadîya Rayberîye têkoşînê seba azadîya şaran o. Azadîya Rayberîye reyde meseleya kurdan zî do bêra çareserkerdene û Tirkîya biba demokratîke. Rayber Apo kesêko normal nîyo; o îradeyê bi mîlyonan kesan temsîl keno. Têkoşîn û çalakîyê seba azadîya ey ganî bi hawayêkê xurtêrî dewam bikerê.

Zîndanan de vera tecrîdî xoverdayîşê embazanê ma berdewam o. Keyeyê tepişteyan zî bi heman hewayî têkoşîn kenê. Şarê ma û dormeyê demokratîkî ganî wayîrê nê xoverdayîşî vejîyê. Pêvînayîşê bi Rayber Apoyî do nefes bido komelî. Vera Rayber Apoyî bêhuqûqîyêka pîle yena kerdene. Ganî avûkatî û keyeyê ci bieşkê Rayber Apoyî bivînê. Wina aseno ke CPT hinî nêeşkeno na rewşe îzeh bikero. Ganî têkilîyê CPTyî yê bi dewleta tirke bipersîyê. Tirkîya endama Konseya Ewropa ya, CPT zî dezgehêkê Konseya Ewropa yo. Ganî CPT û dezgehê bînî vera tecrîdê Îmraliyî erkanê xo bîyarê ca.

Vera şerê qirkerdişî yê dewleta tirke gerîlayê azadîye têkoşînêkê bêemanî kenê. Hêrişê vera Metîna û Rojawanê Zapî giran ê. Nê hêrişan de zafêr çekê kîmyewîyî şuxilîyenê. Dewleta tirke wina hertim sûcê şerî kena. Şer bi giranî Rojawanê Zapî û Metîna de yo. Metîna de PDKyî rayîr dayo dewleta tirke. Dewleta tirke Metîna de xeylêk kişteyî dayî. Embazanê ma vera dişmenî çalakîyê xurtî kerdî. Zap de zî rewşe wina ya: Qendîl, Xakurkê, Behdînanî her roje dîyenê bombayan ver.

Menga hezîrane de dişmenî derbê giranî werdî. Dewleta tirke operasyonê leşkerî yê giranî dayê destpêkerdene û tedaya Iraqî zî kena ke tewrê nê şerî bibo. Çunke hêzê ci qîm nêkeno. No rejîm nika ra pey do birijîyo. 

Vakurê Kurdîstanî de zî şerê gerîlayan berdewam o. Gerîlayî hinî resayî ê îmkanan ke do bieşkê ÎHA û SÎHAyanê dişmenî îmha bikerê. Başûr, Vakur, Rojawan û Rojhelatê Kurdîstanî de her çiqas hêrişê dişmenî dewam bikerê zî xoverdayîşê gerîlayan zî berdewam o. Dewleta tirke û îqtîdarê AKP-MHPyî verê rijîyayîşî de yê.

Polîtîkayê qeyûmî polîtîkayê qirkerdiş, îmha û înkarkerdişê kurdan ê. Dewleta tirke nêwazena ke kurdî bibê wayîrê îradeyî. Kurdîstan kolonyalê dewleta tirke yo. Dewleta nêverdana ke şarê kurdî xo îdare bikero. Ez pê bawer a ke şarê ma do heta peynî vera nê hêrişanê serê îradeyê xo xover bido û ser bikewo. No şerê qirkerdişê kurdan çimeyê her bêhuqûqî, bêedaletî û rijnayîşî yo û heta ke sebebê ney nêwedarîyê Tirkîya do nêeşka bikewa rayîrê raştî.''