Endama Komîsyonê Vera Nîjadperestî û Cîyakerî yê ÎHDyî û Sosyologe Gullîstane Yarkin derheqê hêrişanê nîjadperestan ê vera kurdan de ANFyî redye qisey kerd.

Gullîstane ard ziwan ke Tirkîya de bera komanê cîyayan tim hêrişê nîjadperestî benê û kurd, arman, sûrîyeyîj, rûm, roman û xeylêk komê bînî benê hedefê nîjadperestî. Gullîstane vat: ''Tay hêrişê nîjadperestî yesker bera mal û mulkan, tayê ci vera bedenê merdiman yenê kerdene. Tay hêrişî zî nişka ra asta şexsî de yenê kerdene, tayê ci zî bi hawayêkê organîze û rêxistinkerdeyî hetê girseyan ra yenê kerdene.''

Gullîstane Yarkin ard ziwan ke nîjadperestî hem bi hîsanê şexsîyan hem zî hetê sîstem û dezgehan ra yena kerdene. Gullîstane vat: ''Hêrişanê nîjadperestan ê vera kurdan serranê 1990an de şaristananê tirkan de dest pêkerd. Seba ke verê nîjadperestî bêro girewtene ganî sîstemêko komelkî bêro awankerdene ke îmkan û çimeyê ekonomîk, kulturel û sîyasîyî pêro komanê etnîkan ra bêrê vilakerdene. Seba ke merdimê nîjadperestî bivurîyê ganî hîşmendîyêka xurte ya vera nîjadperestî û têgêrayîşêko xurt ê antî-nîjadperestî vejîyê wertê. ''

Gullîstane Yarkin bale ante hêrişanê 'nişka ra' yê vera kurdan û vat: ''Mîsal eke merdimî serebûtanê Sakarya biercnê vînenê ke kerdoxan nişka ra bi refleksê nîjadperestî  2 kurdê ke qet nêşinasnayêne kiştî. Bîyarê xo vîrî; Sakarya de Kadîr Sakçi, Şîrîn Tosun û Anqara de Bariş Çakan ameyî kiştene. Kadîr Sakçiyî lajê xo reyde kurdkî qisey kerdêne. Kerdoxî persa ke ê kurd ê yan nê. Dima ke musayo ê kurd ê Kadîr Sakçi kişt.

Tek sebebê nê nê hêrişan no yo ke qurbanî kurd ê û kerdoxî zî kurdan sey 'bedenê ke eşkîyenê bikişîyê' dîyenê. Nê hêrişî têna Sakarya de nêbenê. Labelê Şîrîn Tosun û Kadîr Sakçi wextêkê kilmî de nê şarîstanî de kişîyayî. Sakarya de vera karkeranê kurdan hêriş ame kerdene. Çanakkale de zî seba ke kurdkî qisey kerdêne vera Ekrem Yaşliyê 74 serreyî hêriş ame kerdene. Hêrişê winasênî vera kurdan zaf yenê kerdene.

Êyê ke xîret kenê  hêrişê vera karkeran ê kurdan sey hêrişê krîmînalî bimojnê wazenê ke nîjadperestî binimnê. No nêzdîbîyayîş şaş o. Hêrişê vera karkeranê kurd, ereb, sûrîyeyîjan hêrişê nîjadperestî yê. Çunke na cografya de vera karkeranê tirkan hêrişê winasênî nênê kerdene.''