QSD’yî 25 cinî û domanê Êzidîyê ke destê çeteyanê DAÎŞ’î ra xelisnaybî Amûde de teslîmê Keyeyê Êzidîyan kerdî. Êzidîyê ke ameyê xelisnayene dimayê kombîyayîşê çapemenîye ver bi Şengalî kewtî rayîr.
Hêzanê Sûrîyeya Demokratîke (QSD) 25 cinî û domanê Êzidîyê ke destê çeteyanê DAÎŞ’î ra xelisnaybî seba resnayîşê Meclîsê Demokratîkî yê Şengalî teslîmê Keyeyê Êzidîyan ê Amûdê kerdî.
Temsîlkarê Meclîsê Keyeyanê Şehîdan ê qezaya Amûdê, fermandarê QSD`yî, endam û rayberê Keyeyê Êzidîyan û xeylî dazgehê çapemenîyê ke Vakur û Rojakewtena Sûrîye de beşdarê kombîyayîşê çapemenîye bîyî.
Rayberê Keyeyê Êzidîyan ê Herêma Cizîrî Zîyad Hamîdî QSD’yî rê sipas kerd û ard ziwan ke heta nika hezar ra zêdetir cinî û domanî ameyî xelisnayene û wina vat, “Goreyê doneyanê fermî hîna 3 hezar û 40 Êzidî vîndîbîyaye yê.”
25 Êzidîyê ke ameyê xelisnayene ameyî berdene bi berê sînorê Sêmalka. Berê sînorî de endamanê Meclîsê Şengalî 25 Êzidîyî pêşwazî kerdî û ver bi Şengalî kewtî rayîr.
