2700 DAÎŞîyî hepisxaneyanê Rojawan ê Kurdîstanî de estê û nê çeteyî hetê YPGyî ra, bi operasyonanê tarîxanê cîya cîyayan ameyê tepiştene. Nê kesan ra 800ê xo hemwelatîyê welatanê Rojawanî yê û pêroyîye de hemwelatîyê 46 welatan ê. Îdareyê Rojawanî naye ra ver beyanatî daybî û waştbî ke, sere de Almanya, Fransa û DYA bikewo dewre û nê çeteyî bi nê qeydeyî bêrê muhakemekerdene.

Berpirsîyarê Têkilîyanê Teberî yê PYDyî Salîh Mûslîmî no derheq de beyanat da yew rojnameyê Awusturya û va ganî her dewlete hemwelatîyanê xo yê DAÎŞîyan bigîro û muhakeme bikero. Mûslîmî va goreyê yew îdîa, Tirkîya ke hêrişê vakurê Surîye bikero, ney çeteyî zî do hepisxaneyan ra biremê. Mûslimî wina dewam kerd: “Çeteyê ke ma dest de yê, çar hetê dinyaye ra ameyê û welatê Kurdan de hêrişê wehşîyî kerdê. Ma mucadeleyê xo yê înan ver de xeylî bedelê giranî dayî û xeylîyê înan weş tepiştî. Ganî welatê înan, înan bigîro û muhakeme bikero.“

YM, GANÎ SEBA DAÎŞÎYANÊ HEPISXANEYAN BIKEWO DEWRE

Goreyê îdîaya Mûslîmî heta nika tena dewletê Îndonezya, Rûsya, Fas û Sûdanî înan de kewtê têkilîye û DAÎŞîyî waştê. Çîyo ke bale anceno, mabenê ney dewletan de çinbîyayena dewletanê Ewropa û Rojawanî yo. Mûslim wazeno ke Yewîya Miletan  bikewo dewre.

Merkezê  Çapemenîya YPGyî çend rojî naye ra ver kerdîbî eşkera ke, bi operasyonê Firtineya Cizîre, Dêrazor û der-dormeyê Hecinî de 8 çeteyê DAÎŞî bi weşîye ameyê tepiştene û nê DAÎŞîyî hemwelatîyê, Ozbekîstan, Tcikîstan, Qezaxîstan, Ukrayna,Rûsya, DYA û Almanya yê.

Yew DAÎŞî yo hemwelatîyê Almanya kewtbî destê YPG û no hedîse çapemenîya Almanya de amebi rojdem. Nika destê YPGyî de 15 DAÎŞî yê ke hemwelatî yê Almanya yê estê û Almanya seba ke înan peyser bigîro qet hereket nêkena. Derheqê DAÎŞî yo ke nameyê xo Lucas Glaß o, Almanya de serra 2016î ra nat tehqîqat ameyo destpêkerdene la hukmatê Almanya seba muhakemekerdişî ney kesî YPGyî ra nêwazeno.