Kamîle Temê 1982 de Rayberê Şarê Kurdî Abdullah Ocalanî û PKKyî şinasnena û keyeyê xo yê dewa Merga Mîra yê Dêrikî gerîlayan rê akena. Nê keyeyî de Azîme, Binevşe û Sakîne Cansiz (Sara) zî manenê.

Dayîke Kamîle verî ke 2021 de wefat kerdo çenteyo ke Sakîne Cansiz dîyarîya ci kerdbi emanetê lajê xo Dilbirîn Temê kerd. 

Dilbîrîn Temêyo ke 1993 de 12 serrîya xo de Sakîne Cansiz şinasnaya ANFyî rê qisey kerd. 

Dilbirînî vat: ''Embaze Sara seba ke şora koyan amebî keyeyê ma. O çax xeylêk gerîlayî ameybî keyeyê ma la mîyanê înan de embaze Sara zaf bale antêne. Wexto ke amebî keyeyê ma çewî a nêşinasnayêne. La hema hela verêne de a seke kênaya keyeyê ma ya têgêraye. Aye domanan, cinîyan û camêrdan de qisey kerdêne. Seke a wayîra keyeyî bîye. A seke kênaya dadîya mi bîye. 

Embaze Sara nêeşkaye cade şora koyan û agêraye keyeyê ma. Keyfê dadîya mi bi ney zaf ame û vat 'Kênaya mi agêraya keyeyê xo.' Embaze Sara tewr peyên wexto ke şîyêne dadîya mi rê vat 'Ti dadîya min a, hînî tîya de yew keyeyê mi est o.' Aye çenteyê xo dadîya mi rê verda. Embaze Sara teyna hîrê rojan keyeyê ma de mende la seke hîrê serran menda. Têgêrayîşanê aye ra çewî fam kerdêne ke a kesêka zaf zanaye ya. Coka ma tira zaf hes kerd. 

Dadîya mi heta wefatê xo no çente pawit, dima zî sey emanetêkê fîrazî ma rê verda. Dadîya mi cara welatperwer bîye la dima ke ma embaze Sara şinasnaye hîna zaf pabesteyê têkoşînî bîye. Dadîya mi vatêne 'Mi sozêk da Sara.' Xeylêk embazî ameî keyeyê ma la rêç û tesîrê embaze Sara hema zî vîrê mi de yê.''