Fermandaranê QSDyî ra Milîtane Çîya derheqê rewşa herême, hêrişanê Tirkîya û xoverdayîşê şerwanan de ANFyî rê qisey kerd.

Çîya vist vîrî ke Şorişê Rojawanî pê xoverdayîşêkê pîlî, pê kede û pê bedelanê giranan ame kerdene. Çîya pare kerd ke dewleta tirke ya îşxalkere armanc kena ke Rojawan îşxal bikera. Çîya vat: ''Hêrişanê Tirkîya de xeylêk zerar reseno sivîlan ser, sivîlî mirenê, erd û malê înan destî ra şinê. Tirkîya şerê leşkerî ra heta şerê psîkolojîkî her çi xo rê meşrû vînena.

Rûsya û rejîmê Şamî eynê dewleta tirke de nîyê. Herêmanê îşxalkerdeyan de her roje sûcê cîya-cîyayî yenê kerdene. Dewleta tirke her kesî rê vana 'terorîst' la kokimmo 70 serre senî beno terorîst? Pê nê vatişî Tirkîya hêrişê sivîlan kena. Tewr peyên dewa Safwîyê de keyeyêk kişîya. Nêmeyê şewe de hêrişê înan ame kerdene.

Rayîrê M4î her roje hedefê dewleta tirke de yo. Yeno vatene ke warê hewayî girewte yo. Çîyo winasên çin o. Tirkîya tim hewayî ra gêrena, hêriş kena. Tirkîya wazena sînoran wedarna û hîna zêde erdî îşxal bikera. La vera ney xoverdayîşê şerwananê QSDyî dewam keno. Ma hêzê pawitişê erd û welatî yê. Bedelê ney se beno wa bibo ma do bikerê. Hêrişî do dewam bikerê. Hayîya ma pê erkê ma esta. Ma do dewleta tirke îşxalê ci ra poşman bikerê.''