Temsîlkaranê êzidîyanê Rojawanî ANFyî rê qisey kerd û hêrişê dewleta tirke û bêvengîya Ewropa şermezar kerde.

Vervatoxa Yewîya Cinîyan ê Êzidiyan a Rojawanî Suade Hiso ard ziwan ke  Tirkîya wazena qirkerdişê êzidîyan ê DAÎŞî temam bikera û vat: ''Efrîn de verî 25 hezar êzidîyî estbîy la nika 2 hezar êzidîyî mendî. Dewanê êzidîyan de nika kampê cergan, camî û dibistanê dînîyî estê. Efrîn de çarşaf wey wextê DAÎŞî mejbûrî ya, misilmanîye yena ferzkerdene. Dewanê êzidîyan Qimar û Tirind de 30ê tebaxe de 350 keyeyê cergan ameyî cakerdene. No vurnayîşê demografî yo. Êzidîyî wazenê erdê xo ser ke bi azadîye biciwîyê. La Tirkîya nêverdena û her roje êzidîyan dana bombayan ver. Ma venga merdimanê dinya, rêxistinanê heqanê merdiman danê ke hînî nê qirkerdişî vindarnê.''

Hemserekê Yewîya Êzidîyan a Efrînî Hisên Hesenî vat: ''Tirkî dewleta Osmanîyan ra nata hê êzidîyan qir kena. Hêzê mîyanneteweyî ney tesdîq kenê. PDK zî nêwazeno êzidîyî bibê wayîrê îradeyî. Ma sey êzidîyanê Efrînî venga pêro êzidîyanê Kurdîstanî danê ke wayîrê Şingalî û şarê xo vejîyê. Ma na mesele bivisnê rojdemê dinya û nê hêrişan vindarnê.''

Hemserekê Keyeyê Êzidîyan ê Herêma Cizîre Faruq Tozoyî vat: ''Efrîn de gorê êzidîyan yenê hedefkerdene. Êzidîyê ke hêrişanê DAÎŞî de weş mendî nika pê bombayanê Tirkîya kişîyenê. Ez wazena dewletanê dinya ra pers bikera ke gelo şima rê pênaseyê 'qirkerdişî' çita yo? Wexto ke DAÎŞ kişeno qirkerdiş o la eke dewleta tirke bikişa çita yo?''